David Paulus; i inspirá den Kòrsou i Ulanda

David Paulus, un artista lokal ku ta biba na Hulanda, a kue hopi atenshon ora el a keda entrevistá den 2023 riba su trayektoria kreativo i personal. Awe, den 2025, Paulus ta bèk den e programa di djasabra, kaminda su historia i su obra lo keda kontá despues di 2 aña.

Despues di a gradua ku su Bachelor den Dosente di Arte, Paulus a logra pone su nòmber den un posishon respetá den mundu di arte. Su karera no solamente ta reflehá su kreatividat personal, sino tambe e pashon pa inspirá e komunidat di Kòrsou i Hulanda, ku su desishon di sigui den enseñansa.

E notisia ku Paulus pronto t’ei bèk na Kòrsou ku un proyekto nobo ta krea entusiasmo. Pa hopi hende, e no ta solamente un artista, e ta un símbolo di posibilidat. Un prueba ku hóbennan for di un isla chikí por logra kos grandi riba podio internashonal, sin pèrdè kontakto ku nan rais.

Kiko a sosodé den e dos añanan ku a pasa

David ta konta ku den e dos aña ku a pasa despues di e entrevista anterior, el a finalisá su Bachelor komo dosente di arte ‘multidisiplinair’. Esaki ta nifiká ku e tin e konosementu i eksperensia den diferente ramo di ‘beeldende kunst’, kual ta dun’é e kapasidat pa traha ku vários forma i medio artístiko. Durante e mesun periodo, Paulus a risibí diferente tarea ku a pone su talento na prueba, tantu den e área edukativo komo den kreashon propio. Aktualmente, David ta traha komo dosente na un VMBO, kaminda e ta duna lès di arte na nivel Mavo, VSBO i Havo. Pa e, e ròl di maestro ta un forma di inspirá hóbennan i transmití ku arte no ta solamente un ekspreshon, sino tambe un idioma universal ku por habri porta.

Duna lès ta un pashon

David ta konta ku duna lès ta un di su pashonnan. Semper e tabatin e gana di por inspirá hóbennan dor di arte. E ta pensa ku un dia el lo por kontribuí hopi ora e regresá Kòrsou. Su deseo ta pa lanta i fortalesé e sektor kreativo di su isla, i pa hopi mas hóben haña inspirashon i ekspresá nan mes pa medio di arte.

Un mener apart

“E alumnonan ta mira mi i kasi semper nan ta bisa: ‘Esaki ta un mener apart.’” David ta bisa ku e ta strèn, pero den un manera hustu. E hóbennan di awor ta buska klaridat, i David ta duna esaki for di promé dia: tur regla ta keda bisá i tur hende tin ku tene nan mes na dje.
Na Hulanda, hopi dosente tin un estilo mas trankil, kompará ku e estilo ku el a kustumbrá na Kòrsou kual ta mas direkto. “Mi no ta bisa ‘eerste, tweede keer’. Mi ta bisa no mesora. I hopi bia e muchanan ta gusta esaki, pasó nan ta sinti kiko mester pasa,” e ta bisa.

Kombiná e arte

Segun David, e ta un reto grandi pa e hóbennan di edat di skol sekundario, pasó hopi di nan no ta interesá den arte. “Mester stimulá nan hopi pa nan traha algu,” e ta konta. Gran parti di nan tin mas interes pa futbòl, i nan no ke tende nada tokante di arte.

Pa enfrentá esaki, David ta kombiná su lèsnan di arte ku futbòl. “Manera resientemente, nan a mester a krea un tishùrt. Mi a sugerí pa nan diseñá un unifòrm nobo pa un ekipo di futbòl,” e ta splika. E manera akí a krea hopi interes, dor di ‘spelenderwijs’, bo ta laga nan siña sin ku nan ta sinti ku e ta un obligashon. “Beeldend vorming’ no ta algu ku nan ta sinta warda riba dje, pero e ta den e kuríkulo. Mi trabou ta pa trese e na un forma ku nan ta siña i disfrutá pareu.”

Diferente eksposishon

E aña akí, David ta bisa ku el a realisá dos proyekto grandi. Un di nan ta un modeshow ku el a organisá ku e tema “Paga Tera.” Pero e no ta e “paga tera” di ántes ku nos ta pensa, esaki ta referí na e herensia di su abuelo, ku semper tabata basha un tiki ròm na suela. David ta bisa ku e akto di su abuelo tabata un ekspreshon di honra su antepasadonan, i el a tuma esaki komo inspirashon pa su show di moda. Den e show, el a usa diferente material ku ta rekreá e nostalgia di “Ata mi dushi Kòrsou.” El a inkorporá patron di disiklin, blous, awa di maravia i sensianan ku ta representá nos tradishon i kultura. E show di moda ta un kombinashon di elementonan katóliko, e influensia afrikano, ku a meskla ku otro tradishon, kual a resultá den un obra kreativo i original ku ta splika e historia i kultura di nos pais.

Na mesa

David ta sigui konta ku su eksposishon aktual, ta den Staathuis Nijmegen, ku e título “Mesa”. Tur hende sa ku mesa na Kòrsou tin hopi nifikashon, pasó nos ta sinta na mesa pa kome, hasi bòmbòshi, i tambe nos ritualnan, manera risibimentu, unda nos ta duna mesa un lugá spesial manera ta mesa di kasamentu. Ku esaki den mente David a buska yu di Kòrsou ku ta biba na Hulanda, mas o ménos 30 persona, pa traha huntu riba e instalashon. Na mesa, nan a kombersá, a papia di kantikanan di ántes, manera tumba, i a rekordá hende ku no t’ei mas. Pero nan no a enfoká solamente riba pasado, nan a pone tambe algu di nan mes den un kuadrángulo. Un a brei, otro a flèktu, i asina nan a ekspresá loke nan ta sinti falta di dje di Kòrsou.

A buta tur e obranan maestral akí huntu i a forma e paña di mesa i a duna bista total di e instalashon. E partisipantenan ku tabata tin un historia interesante a skibi nan relato i a saka potrèt, ku despues tambe a keda eksponé banda di e instalashon. David ta bisa ku e intenshon ta pa krea un instalashon mesun kos asina na Kòrsou. “E proyekto ta algu hopi dushi i mi lo ke hasi e tambe na Kòrsou.”

Bèk na su rais

David ta splika ku ta importante pa e komprendé su herensia i orígen. Danki na su estudio, el a bai mas profundo den historia di su famia pa komprendé dikon sierto kos a tuma lugá i pa komprendé su famia mas mihó. El a pasa basta tempu den Archivo Nashonal i a sinta kasi un luna, mainta i atardi, pa hasi un investigashon riba su palu di famia.

Di parti di su tata, el a sigui e liña te añanan 1821, kaminda e tabtin un abuela ku yama Josepa Chepa, i el a haña un yu ku tabata yama Pedro Paulus Visensia, ku tabata opa di su opa. Na 1860, tres aña promé ku abolishon di sklabitut, el a deskubrí ku su famia a usa nan nòmber di meimei pa nan yunan. Su famia Paulus ta originalmente un nòmber di meimei. David a konstatá tambe ku su antepasadonan tabata hopi kreativo i ku nan tabata kose.

E investigashon a krea un klaridat grandi riba su historia i herensia. David ta konsehá pa tur hende buska i komprendé ken nan famia ta i nan historia, pasó esaki por duna bo un komprendementu fuerte ku lo yuda bo krea i inspirá bo arte.

Arte ta un manera di ekspresá bo mes

Riba medio sosial, bo ta nota ku hende ku no ta komprendé arte ta komuniká esaki dor di ménos presiá e arte, sin sa ku arte tambe ta un manera pa ekspresá bo mes. Bo no mester gusta tur kos ku bo ta mira, pero bo por sostené e artistanan na Hulanda ku ta trese kultura di Kòrsou dilanti, manera resiklá, baile, kanto, i otro ekspreshon, e ta bisa. Tur hende ta ekspresá arte na nan manera, i asina e hende na Hulanda por komprendé i konosé Kòrsou, maska distansia físiko ta grandi. Kòrsou a kuminsá bira hopi mas visibel den arte, ku teatro, seú, karnaval, i videonan di Tula.

Tin trabou pero no ta fásil

David ta sigui bisa ku tin trabou den arte, pero e no ta fásil pa gana sèn, pasó hopi hende ta kome den e mesun tayó. Pa logra bo meta, bo mester bira un artista ku ta konosí i ku su trabou ta visibel. Pero pa e hendenan di Kòrsou, semper bo mester tin un trabou den banda, komo arte ta un tiki personal, un ekspreshon di bo identidat i kultura.

Nominá

David ta konta ku un sonrisa riba su kara, ku pa e, tabata un honor pa keda nominá. E Shak de Lou Prize ta un premio ku ta keda duná na un persona di kada departamento ku ta representá e departamento den e mihó manera. Bo tin baile, teatro, i  David ta forma parti di ‘beeldende vorm’. Tur e dosentenan a skohé David, i djis e nominashon ta laga bo sinti ku bo a gana. “Den e 1600 studiantenan, mi tabata un di esunnan ku a keda nominá,” e ta bisa ku orguyo.

Bai p’é

“Bai p’é, pero tene na kuenta ku no ta fásil.” David ta bisa ku for di aña 2007 ku el a kuminsá, awor, e último 6 añanan a bai hopi bon. Bo mester tin hopi pasenshi i konsistensia, pa ora e ku e no bai manera bo ke, pa bo sigui purba. Un punto hopi importante ta pa tin hende ku ta kere den bo, hende ku ta sostené bo for di ora bo kuminsá te ora bo logra. Bo mester tin e determinashon i persistensia pa enfrentá e bataya. Si bo ke gusta arte, David ta enkurashá e hóben pa bai p’é i kisas hasi un estudio básiko, pa bo tin algu ku ta sirbi komo un fundeshi. Manera David a menshoná anterior, e no ta fásil pa biba solamente di arte komo un ‘upcoming artist’.

Un soño

David ta bisa ku e tin dos soño grandi. Un di nan ta pa partisipá na New York Fashion Week, despues di e eksperensiá na Paris i London. E otro soño ta pa duna un aporte real na e sektor di kultura di Kòrsou. Manera nan ta bisa: “What you believe, you will achieve.”