Nathalie Siberie
Awe ta nos último programa den kuadro di luna di mama, luna di Mei. Mamanan a konta nan historia, kon nan a bira mama, a duna tepnan i awe nos tin e último mama den e seri di programa aki. Awe nos ta papia ku Nathalie Siberie, un mama tambe eksepshonal. Un mama di 6 yu i e den mayoria di e añanan komo mama, ta su so a lanta su yunan. Nathalie a lucha hopi lantando 4 yu muhé i 2 yu hòmber.
Ki impreshon di ser mama; Nathalie a konta Djasabra ku semper e ta gusta mucha. Nan tabatin un bisiña ku ta wak su nietu i Nathalie ta kòrda ku e tabata bisa su mama ora e sali skol ku e ta bai serka Yachi, e bisiña pa e yud’é ku Junny. For di einan Nathalie a bisa ku ora e tin un yu, meskos e lo hasi ku di dje tambe.
Lanta na kas; Nathalie tabata 3 ruman na kas ku tur ta mucha muhé. Dos tabata di su mama mes i un di kriansa. Nan a wòrdu bon lantá, strukturá. Por ehèmpel e ta puntra su yunan kiko nan ke den pan pero ántes esei no tabatin mag. Ta loke e mama pone ta esei tin di kome. Papia semper ku dos palabra, yama bon dia bon tardi, asina nan a lanta.
Su so ku su yunan; Nathalie a konta ku ta su so a lanta su yunan. Manera el a bisa nos ta e mes tabata mama i tata di su yunan. I esei no tabata fásil pasobra ta 6 yu. Ora el a haña su promé yu a bai masha bon mes. E tabata kontentu ora el a sinti kiko ta mama. Ta algu masha dushi ora bo ta mama. Nathalie tin su mama i ora e bai traha su yunan tabata keda serka su mama te ora nan por a bai krèsh.
Bai skol tambe; Siendo ku su yunan, Nathalie a disidí ku e ta bai sigui skol. El a bai SPW anochi. E ta sali trabou, bai skol i despues bai kas. Skol tabata kaba te 9 or. El a logr’é ku yudansa di su mama. Nathalie ta hopi orguyoso kon el a lanta su yunan, ounke e ta kere ku si e tabatin mas tempu e lo a dediká mas na su yunan tambe. I p’esei kada momentu ku e tabata haña pa duna su yunan atenshon e tabata hasié i awe e ta mira e fruta.
Kiko tabata e kos mas importante ku el a hinka den su yunan; Nathalie a kontestá ku el a hinka hopi amor, dedikashon i bon edukashon. Komo yùfrou di krèsh i skol, su yunan ta na promé lugá. For di ora ku bo ta eduká yu di otro hende bo yunan tambe mester ta bon. Bo no por duna yu di otro hende bon edukashon i di bo nan no. Esei el a hasi te awe. Nathalie ta traha na krèsh i ta haña yunan for di baby. I e tabata un piesa klave den lantamentu di e muchanan ei tambe. I einan tambe Nathalie ta mira e fruta awe. E ta mira muchanan ku a bin krèsh serka dje, awe ta na Merka ta hunga baseball.
Tabatin kos ku bo a hasi komo mama ku awor bo ta bisa ku bo mester a hasi otro; Riba e pregunta ei el a kontestá ku no tin anda ku el a hasi komo mama ku awe e ta haña ku mester a hasi otro. E tabata kana e kaminda stret pero su yunan na promé lugá. Kiko ku pasa ta su yunan ta bin promé. E por keda asta sin kome pero su yunan no.
Trahadó na krèsh; Siendo un yùfrou na krèsh Nathalie a bisa ku su yu muhé mas grandi a sigui su pasonan. E yu tin 22 aña i ta hasiendo meskos kuné. Promé ora e yu tabata mas chikí e ta kòrda kon muchanan ku e tabatin na krèsh ta bin kumind’é i e yu ei tabata bis’é si e no ta kansa ku kada bes e muchanan ta bin kumindá. Awe sinembargo e ta den mesun sapatu. I awor e yu ta bis’é ku e ta komprondé dikon e muchanan tabata hasi asina ku Nathalie. Ora bo duna mucha amor i si nan mira bu, outomátikamente nan ta bin serka bo i ni maske ku ken nan ta. Esei ta un satisfakshon grandi segun Nathalie.
Nunka a sinta ketu; Nathalie nunka a sinta ketu. Trahando na krèsh el a bai SEDA kaminda el a siña lora man tambe. Esaki pasobra 6 yu no ta wega i e lucha tabata grandi. Nathalie ta kòrda ku un prima di dje a bis’é di ser empresario. El a bai i a topa sra. Mirtha Leetz ku por sierto tabata su dosente den pasado. Den e lèsnan el a siña kiko e tabata hasi fout i kiko hasi pa bai dilanti, kon pa promové su negoshi, kon bai un marshe. I ku tur loke el a siña, e tabata kana uniformá pa bende su kosnan. Na final di e lès e mester a trese dilanti kon e tabata i kon el a bira. Ta un kambio grandi. Su empresa ta traha zeta di koko di ántes i su yu muhé di 17 aña ku tambe a sigui lès na Seda i ta traha kokada pretu. Awe e yu muhé tin su negoshi NashaQueen kokada pretu.
Sòru pa e yunan muhé yuda otro; Tabata masha interesante pa tende kon Nathalie a kria su yunan. E ta konta nos ku el a sòru pa su 4 yunan muhé, ku nan ta 4 ruman muhé i ku mama ta 5, kada un a bai lès pa yuda otro i no mester saka sèn. Un ta pinta kara, otro hasi kabei, otro hasi uña. Kisas ora hende wak nan hende por kere ku nan tin sèn pasobra semper uña ta bunita, kabei na nèchi i kara pintá, pero tur esei ta for di kas el a sali. Un ta hasi kos pa otro.
Kon mamanan ta lantando nan yunan awendia; Riba esaki Nathalie a bisa ku e problema den komunidat awor aki ta ku yu ta haña yu. Kon e yu ei por eduká su yu si e mes ta un yu ainda i no a kaba di forma su mes kompleto. Einan e problema ta, segun Nathalie. E ta kere ku e edat apropiá pa aña ta 20. E mes a haña su promé yu ku 18 aña i p’esei el a sòru pa bisa su yunan pa no haña yu mesun yòn kuné i p’esei te ainda niun di su yunan tin yu. Una bes ku bo bira sea mama òf tata, e ta pa semper.
E falta di e figura di tata; Nathalie a bisa ku na kuminsamentu tabata duru. Pero unda bes el a pone su dilanti ku e ta lanta su yunan, e ta bai pasobra kada un di e muchanan ta mira ku ta ku sodó di su frenta el a lanta kada un. Kada un di su yunan sa kiko el a nifiká pa nan i su yunan ta demostr’é esei. Nathalie a sigui asina tambe e pasonan di su mama. Su mama tambe a lanta nan sin nan tata pero bon lantá.
Konseho pe mamanan; Nathalie ta bisa ku si bo ta bo so, bai pe pasobra bo yu ta di bo e ta. Lucha te final pa bo yu pasobra ta di bo e ta. Mañan e lo demostrá bu esei. Esei su yunan a hasi kuné.
