Geomaly Campagnard i Sharlon Bailey

 "Children Priority One", un proyekto di Kiwanis Klup Kòrsou pa yuda mucha i hóbennan ku ta nos futuro. Pa elaborá mas riba e tópiko Djasabra a papia ku Sharlon Bailey, presidente di Kiwanis Klup Kòrsou, i Geomaly Campagnard,  “Lieutenant Governor Vision 2026”.

 Meta “Children Priority One”

"Children Priority One" ta un proyekto di Kiwanis Klup Kòrsou ku ta enfoká riba e bienestar di e mucha. E prinsipio prinsipal di e proyekto ta pa yuda i guia e mucha ku ta den un situashon difísil. E mucha ta e prioridat, e mucha ta promé, i despues e komunidat ta sigui. Ku mas di 100 aña di eksistensia, e proyekto ta pone enfoke riba kon nos por yuda e mucha di un manera ku e ta krese salú, ku siguridat, i ku oportunidatnan pa un mihó futuro. Sharlon Bailey a indiká ku pa komprondé e nifikashon di "Children Priority One,", mester wak kon e mucha ta lanta na kas. E generashon a kambia, I no ta manera ántes mas. Sharlon ta splika ku den su tempu, hendenan manera wela, tanta, tio, i bisiña tabata tira un bista riba e mucha. Awendia, e muchanan no ni sa ken ta su bisiña, ni unda e mama òf tata ta. E proyekto ta purba identifiká e nesesidatnan di e mucha I purba di yuda no solamente e mucha pero tambe e famia. Tin situashon ku tin kas ku tera abou, falta di lus, òf material pa studia. E proyekto ta kolekta tur e informashonnan aki I ta reuní i wak te na unda por yuda. Tin e posibilidat ku e organisashon ta aserka terseronan pa kolaborá pa bini ku un solushon. Por ehèmpel e organisashon lo por aserka EXTRA komo un plataforma pa informá e pueblo di loke ta pasando den e komunidat.

No ta eksponé e mucha

E organisashon no ta eksponé e mucha su identidat, esaki ta prohibí. Ta protehá e mucha na tur momentu, ta evita pa e mucha su kara, nòmber  òf fam ta bai den públiko. E organisashon ta duna servisio ku ta kubri tur área di bida di e mucha, ku ta sosten i guia. E prinsipio ta kla: e mucha ta e prioridat, semper. Loke ta riparabel ta e kambio den famia. Antes, regla ta ku tata tabata traha i mama tabata keda kas pa guia e mucha. Pero awendia ámbos mayor di kas mester traha. E pregunta ta bira: ken ta guia e mucha? Ken ta yuda e mucha si nan tin nesesidat? Ken ta duna un man? Ne momentu aki "Children Priority One" ta aktua. E organisashon ta evaluá e reto ku e mucha ta enfrentá i  ta traha pa asistí. Por ehèmpel, un mucha por biba den un kas stabil pero si e no tin un adulto ku por duna e guia, disiplina, òf un ruta, e ta keda vulnerabel.

nesesidat  pa yuda e muchanan

Geomaly Campagnard na su turno a mustra riba e nesesidat pa yuda I guia ta oumentá tur dia di nobo. E realidat ta ku nos ekonomia i situashon finansiero ta den un krísis, hopi hende ta pèrdè trabou, pobresa ta bini mas den bario i famianan. Di un banda, bo por mira skolnan ta enfrentá difikultat pa mantené e muchanan su atenshon, i di otro banda bo por mira falta di infrastruktura pa guia muchanan ku ADHD, outismo, i otro desafionan ku no tabata tan konosí ántes. Otro aspekto ta e kultura di “bèrgwensa.” Tin hende ku no kier pidi yudansa aunke nan ta den nesesidat. Otro hende por bira agresivo ora un otro ta trata di yuda nan. E orguyo aki ta un opstákulo mas ku ta stroba desaroyo. Awor aki e muchanan no ta hunga den bario. Kaminda ántes nos tabata hasi sport, bida sosial, i normanan tabata uní komunidat, E norma- i balornan di un komunidat solidario a disparsé. Nos tabata yuda otro mas kompará ku aworakí. E muchanan no ni sa di bisa bon dia, bon tardi òf bon nochi. Tin algu a bai kompletamente robes den edukashon. Sharlon a menshoná ku si drecha e mundu di e mucha, lo drecha e mundu pa tur hende. Si nos kuminsá na e mucha, nos ta krea un base, di kual e mucha lo transmití pa su famia.

Reto grandi

Un otro reto grandi ta e falta di kooperashon efektivo entre organisashonnan. Segun Geomaly, tin basta fundashon ku ta hasi e mesun tipo di trabou. Esaki ta krea un barera ora ta bai pidi fondo, negoshinan ta kuminsá deskonfiá I e muchanan ta keda sin yudansa. Esaki ta indiká ku nos mester struktura e organisashonnan. Mester krea un plataforma unifiká pa por separá e tareanan pa kada fundashon, ku kada un ta konsentrá den un área diferente. Por ehèmpel, un fundashon ta kubri Banda Abou, otro Meimei, i otro Pariba. Asina e lo ta mas efektivo, i komunidat lo mira ku tin un plan

Union ta hasi forsa. Si nos tin un plataforma unifiká, nos por logra nos meta pa e mucha i bai mas leu dor di yuda e komunidat den un forma kontinuo. E echo ku mi ta bai traha kubo no ta nifiká ku mi ta bai traha bou di bo. Nos tin e pensamentu "robes". E ta fásil, ora e hubentut mira kon nos por traha ku otro nan tambe ta komprondé ku nan mester traha ku otro. Geomaly ta bisa ku loke ta hasi e hopi kontentu, ta di mira ta e parti di deporte. Ta un tim ta gana i bira kampion i e no ta komprondé dikon te ku awe ora nos sali for di deporte, nos ta laga tur e informashonnan ei keda un banda, i nos ta bira individual. Kaminda si nos sigui e ehèmpel di un tim, hinka e den práktika na trabou òf kualke área di nos bida tambe nos lo por bira kampion.

Fondo pa proyektonan

Sharlon ta bisa, pa ta honesto nos ta hasi fundraising pa rekobrá fondo pa hinka den komunidat, prinsipalmente pa e muchanan. Tin bia nos ta haña grupo di mucha ku ta keda den internat. Sea ku nan tin famia òf nan no tin, nan mester bai skol, nan mester di tas I material. Pero hopi biaha e situashon familiar no ta esun di mas mihó, i nan no tin e moda pa kumpli ku esaki. E internat ta aserká e organisashon pa wak te unda e organisashon por yuda nan.

Un ehèmpel di e trabounan di e organisashon ta ku par di aña kaba, promé ku skol kuminsá e muchanan por bin pela sin niun gastu. Ku e apoyo di kuerpo polisial, ku tambe a djòin e organisashon, nan a pone stulnan di barbero, i algun polis a pela e muchanan. Ken tabata e muchanan ku ta bin? Ta e muchanan ku nan mayornan no tin moda pa paga un barbero. Tin mas hende tambe ku ta aserká pa yudansa.  Pa logra esaki, e organisashon tin kontakto ku instansianan manera SOAW pa identifiká muchanan di ménos rekurso. Loke ta notabel ta ta ku tur fundashon ta bai pidi fondo na mesun lugánan. Enbes di haña mil florin, bo ta haña shen florin. Negoshinan i negoshante ta mira e nesesidat den e komunidat, pero nan no tin tempu, miéntras nos, ku nos organisashon, si tin e tempu, Geomaly ta bisa. Nos tambe ta empresarionan, nos ta traha dia i anochi. Pero, nos a pone un banda loke nos ta hasi pa por duna bek na e komunidat, spesialmente pa e mucha.

Traha huntu

Geomaly ta señalá ku nos mester traha huntu pa buska un solushon struktural pa resolvé e problema. No mester yuda pa un momentu I kla, e mucha mester sali for di e situashon. E no por keda mira mesun kos tur dia. Hopi hende no ta rekonosé ku e situashon ta grave. Miéntras un grupo ta mira e problema, otro ta aktua manera nan no tin nada hasi, i asina e situashon ta keda multipliká. Un otro asuntu ku nos mester enfoká riba dje ta kreá den nos rais e parti patriótiko. E patriotismo i deseo pa yuda otro ku tabata karakterístika di nos kultura a disparsé. Nos mester kuminsá stima e isla aki. E no ta solamente palu i tera, e ta e hende tambe. Nos mester saka man pa yuda otro. Antes, si mi pasa mi bisiña hende grandi ku un tas, bo ta bira yuda e, Sharlon ta indiká. Awor, hendenan ta kana pasa bai riba bo sin un bondia, bòn tardi, ni bonochi. Norma i balor a bai patras. P’esei nos ta buska un manera pa rebibá e kultura di ántes, i pa yuda e hóben. E hóben no ta haña informashon di kon bida tabata ántes. E mucha ta e fundeshi di komunidat. Segun sr. Sharlon, si bo drecha e fundeshi den un forma balansa i stabil, e komunidat tambe lo reflehá esaki. Si nos kuminsá ku nos hubentut, nos por krese un generashon ku mas balor i un pueblo mas solidario. Nos responsabilidat ta pa transmití rèspèt i norma. Si nos lo lag’é muri, nos no sa kiko ta spera pa nos futuro.

Proyektonan aktual i plan pa e futuro

Kiwanis Klub Korsou tin diferente proyekto aktivo ku ta kontribuí na e komunidat. Un di nan, por ehèmpel, ta e “Greenhouse Project,” ku a keda implementá den skolnan. E proyekto aki no solamente ta siña e muchanan planta, pero tambe e ta enfatisá e importansia di planta nos mes kuminda. Esaki ta esensial pa e futuro. Ademas, e organisashon tin e proyekto di “Lees 1 i Lees 2”, kaminda miembronan di e klup ta bai den skol I ta konta kuenta i lesa buki. Esaki ta fortalesé e konekshon entre hubentut i adultonan, kreando un ambiente edukativo.

Pa siña un mucha òf yuda un komunidat den manera struktural, nos mester tin pasenshi. Ora bo ta hasi un trabou ku amor, e no ta un obligashon, sino e ta bira un pashon. Anto e mesun pashon ei ta lanta hopi di nos miembronan pa sigui dediká nan tempu i energia. Sharlon ta bisa, ku tin bia despues ku e kaba di bati kabes ku e otro miembronan pa yega na un akuerdo, ora e ta den outo ta bai kas e mes tin ku hari. Paso ta un plaser pa por sali kas i debatí ku su koleganan. Nos tur tin e mesun vishon i ta traha pa un meta komun.Nos mester komprondé otro i traha huntu asina nos ta logra kosnan grandi.

Union ta hasi forsa

E trabou ta unu inmenso pero, Sharlon ta kere den e filosofia “si kada un di nos dediká maske ta 1 ora na e trabou e ta bira ménos pisa”. Union ta hasi forsa, manera nan ta bisa “United we stand, divided we fall”. Geomaly ta agregá ku wikènt aki e organisashon tin “Division Counsel Meeting” kaminda tur e koleganan di divishon 26 ta reuní pa interkambiá idea I diskutí riba diferente tópiko. Koleganan ta bini for di Boneiru, Aruba, Sürnam I Trinidad & Tobago. E  reunionnan ta kombiná ku aktividatnan sosial pa stimulá kooperashon I relashon.

Ku trabou struktural, kooperashon i un deseo pa drecha fundeshi di e komunidat, nos lo por mira un futuro ku mas oportunidat pa nos muchanan. “Children Priority One” no ta simplemente un proyekto, e ta un prinsipio ku por inspirá tur hende pa saka man pa yuda otro.