DEN HAAG – Mientras cu den Conseho di Minister di Reino di 30 di September ultimo a dicidi cu e presupuesto di Aruba ( hunto cu esun di Corsou y St Maarten) mester cumpli cu e norma di presupuesto conforme e protocol di LAFT pa 2023, e deficit permiti pa Aruba pa 2022 mester keda calcula ainda. Asina secretario di estado Alexandra van Huffelen ta raporta na Tweede Kamer den un carta fecha 11 di October 2022 (awe). E deficit pa e otro islanan ta determina caba, y ta Aruba so ainda no a cumpli cu dunament di e cifranan pendiente.
GOBIERNO DI ARUBA MESTER MANDA CIFRA AINDA
“E cifra pa Aruba eventualmente por cambia ainda basa riba informacion extra di Aruba” e mandatario ta bisa, refiriendo cu Aruba mester suministra informacion pa asina Hulanda y CAFT por determina kico e deficit final pa 2022 por ta” e mandatario ta sigui bisa. “ Pa yega na un decision riba e determinacion di e deficit financiero maximo, ta necesario pa ricibi un conseho di CAft, basa riba e informacion cu gobierno di Aruba mester manda ainda”, van Huffelen ta sigui bisa. “Ta for di e conseho ey, por deriva un estimacion di e saldo di likides di 2022”, e mandatario ta finalisa bisando.
AYUDO DI LIKIDES
E mandatario a recorda tambe cu basa riba conseho di CAFt, RMR a dicidi cu Aruba no ta haya mas sosten di likides pa 2022, pasobra segun e organo consultativo, e isla no mester di dje tampoco. Y Aruba tampoco no a haci peticion pa e sosten ultimo biaha. Segun CAFt, Aruba ta cera aña 2022 cu un saldo positivo di likides di 19 miyon florin.
