Nos tabatin Vanessa Gomes den kas un biaha mas pa nos papia di Kuida Kurpa pero muchu mas avansá. Vanessa resientemente a keda sertifiká komo Corporate Welness Specialist. Ta trata di un sertifikashon kaminda e por yuda duna konseho na nivel stratégiko na organisashonnan lokal i internashonal kon pa duna atenshon strukturá na e konsepto di bienestar di e empleado na trabou. Bienestar ta algu general pa nos tur pero teniendo na kuenta ku nos tur den e forsa laboral ta pasa hopi ora na trabou, e impakto di bon ambiente òf ménos bon na trabou tin su influensia direktor riba nos bienestar. Hopi ta pasa oranan sintá na trabou i si bo ta sinti kómodo e ta kontribuí na bo bienestar pero na momentu ku e sirkunstansianan ta mas difísil e por kontribuí na un manera negativo. E avansenan rònt mundu a trese kuné ku mas i mas tin di dediká atenshon strukturá na e bienestar di e ser humano profeshonal ku na final di dia no solamente ta kontribuí na bienestar di e ser humano den komunidat pero e benefisio ekonómiko di e organisashon. Un hende salú ta yuda bu logra bo metanan komo negoshi i logra e positivismo finalmente.
Konsientisashon
Si den pasado ta bisa e trahadó ku e tin di laga su problemanan pafó di trabou awor kos a kambia. Vanessa a splika ku ta tur área den nos bida esaki tambe a kambia i nos a bira mas konsiente. I no solamente dor di opservá i eksperensia di bida pero tin estudionan ku ta proba ku ta pone e relashon direkto entre e bienestar problema i preokupashon. Nos no ta un robòt i e problema ta na ku nos i mester buska solushon pa e problema. Si no tin e solushon, bo no tin trankilidat i e ta kita ku e trahadó por tin pas mental i strès ku na su turno ta influensiá tur área di nos bida. Promé ku pandemia esaki tabata relevante pero despues e etapa di pasa dor di e pandemia tabata asina ‘stressful’ ku te awe nos ta buska yudansa, solushon i informashon pa ekipá nos tur komo ser humano pa dil ku nos mes strès. I lo yuda hopi si doño di trabou, mènedjer, lider por influensiá i kontribuí na e konosementu ku na su turno ta kontribuí na bienestar di e persona.
Atenshon na bienestar
Vanessa tin sigur 5 aña kaba ku su programanan di bienestar personal bou di e nòmber di Kuida Kuida i e ta hasi charla, workshop i asta sekshon di coaching pa yuda konsientisá kiko esun ku ta guia por hasi na su mes bienestar. Esaki por kondusí ku na sierto momentu bo ta bai papia ku kisas un grupo òf departamento òf organisashon i ta yega direkto òf indirekto na e doño di negoshi òf lider di e tim. E opinionnan ta dividí pero e grupo di mas grandi di esnan ku tin di tuma desishon den e organisashon, nan ta konsiente ku tin algu ta pasando i mester duna atenshon na e bienestar pero nan no sa unda pa kuminsá. E konsientisashon tei sigur, semper tin grupo chikí ku ta pensa e forma tradishonal pa tene e problema di kas na kas, pero e ta sinti ku e direkshon ku ta bayendo ta ku e grupo grandi ta pensa ku e tin di duna mas atenshon na bienestar òf trese informashon na e personal pero no tur bia sa kon pa kuminsá. Esei ta e punto kardinal, unda kuminsá pa duna atenshon na e bienestar di e kapital humano.
Kuminsá skucha
I unda kuminsá? Riba e punto aki Vanessa a bisa ku tin diferente punto bálido pero un di nan mas simpel ta kuminsá ku skucha. Skucha wak kiko ta e feedback, e opinionnan ku ta tende ora e persona den organisashon ta komuniká ku otro. Por kuminsá wak si e persona ta largu malu, e persona no tin bon beis, e persona ta mustra demotivá, esun ku semper a funshoná bon pero direpente tin bahada den benta. Ora esei ‘trigger’ e kuriosidat, bo ta bira mas opservativo i e parti di skucha, hasi pregunta, opservá i di einan kuminsá kana e kaminda no manera ta hasi te awor di hasi ‘teambuilding’ òf charla duná pa un dòkter, nan no ta tene e solushon struktural. E oportunidat grandi ku Vanessa mes a bira konsiente di dje dor di e kurso ku el a hasi, meskos ku ta plania strategia di benta i merkadeo òf presupuesto, para ketu i pensa ki strategia por desaroyá pa durante di aña tin diferente momentu pa kontribuí na bienestar di e personanan ku ta traha pa bo.
Wak pa futuro
Kua sektor ta esun ku mester di mas atenshon i tin di traha mas riba nan bienestar, ta otro punto ku Vanessa Gomes a pone atenshon riba dje. El a splika Djasabra ku si wak futuro ku ta papia kon prepará nos ta, mi mira riba esaki ta importante pa nos tur komo ser humano pero tambe komo organisashon ta prepará pa biba den mundu kaminda e konosementu di bo fishi ta importante pero bo konosementu sosial emoshonal tambe ta importante pa karga ku e kambionan. Ta keda importante pa duna èkstra atenshon na e personanan den funshonnan di promé liña manera kuido, enseñansa, servisio na kliente, e profeshonnan mas dirigí na e parti di kontakto humano diariamente, ta einan bo ta sinti e nesesidat kon importante ta pa duna èkstra atenshon. Nan trabou ta rekerí asina tantu energia pa e kontakto sosial pa otro persona ku no ta sobra tempu pa nan mes.
Strategia
El a splika ku por lo general gruponan ta aserk’é. E ta hasi regularmente charla, tayer di trabou i asina un boka ta bisa otro i e ta haña petishon di organisashonnan pa ofresé charla òf tayer pa kontribuí na esaki. E aktividatnan kualke ku hasi ta balor agregá. Ta importante pa sigui haña informashon i refreská memoria. Hopi konosementu ku nos mester ta den nos kaba pero ta lubid’é i p’esei mester ‘shake e up’. Kaminda e ta mira oportunidat ta kaminda organisashonnan na nivel stratégiko ta bai wak kon ta traha plan di mantenshon di bienestar di nos hendenan. I no ta solamente un charla òf aktividat pero komo kolektivo kon ta hasi negoshá sierto sosten i yudansa. El a bisa por ehèmpel seguro no ta kubri tur servisio di sosten mental. Ta dependé ki spesialista i seguro tin esaki. Imaginá komo doño di trabou i komo kolektivo pro negoshá ku koleganan pa tin sosten ilimitá òf mas sosten ainda. E oportunidat ku ta eksistí na lugá di ami bai gym i paga “fee” pero si mi doño di trabou hasié, komo kolega di e tim di trabou ta haña un poko deskuento. Djis imaginá ku ora papia di bienestar i para ketu ku bienestar ta mas ku e físiko i tur e áreanan finansiero manera organisashonnan ku paketenan ku por spar na sierto interes pa ora yu pa studia, e parti di sosten na spesialistanan i bo mes ke hasi algu na formashon, tur área di bienestar ta oportunidat pa e doño di negoshi por sera dilnan ku instansianan i profeshonalnan di balor agregá pa e organisashon. Aki ta mira e futuro lo ta, ta un konsientisashon di e bienestar kolektivo. Mas mihó informá e kolega ta, mas e por yuda otro den trabou, mas kolektivo ta den produkshon i ta un ‘win win’ pa tur.
Te Finlandia
Kuida Kurpa i awor tambe sertifiká pa e parti di bienestar korporativo, Vanessa a bisa ku e ta sigui amplia sigur sigur. E ta besig ta ekspandé i e ta hañando petishonnan pa charla na Boneiru i Aruba. El a haña oportunidat di bai te Finlandia pa papia riba e programa di Kuida Kurpa bou di e nòmber di ‘Resilience and Wellbeing’ pasobra e nesesidat pa por kombersá riba e tópiko aki ta asina importante i por mira u no ta den tur pais i kultura ta konfortabel ku e tópikonan aki. Na Finlandia nan ta maestria den e teoria i por splika sientífikamente kon kos ta hinka den otro pero na momentu di tin e kurashi di papia i mustra e nesesidat nan ta poko inkómodo. I el a yuda fasilitá e kombersashonnan aki pasobra e tin e konosementu i esaki ta un kombinashon di e parti teorétiko i e konosementu a base di eksperensia di bida. No ta un materia ku por presentá sientífiko so pero e eksperensia den bida, kontratempu kon a surpasá esakinan, bria den skuridat, tur ta yuda. Nos tur ta pasa dor di e pruebanan di bida dor di tin kurashi di papia di nan. E ta habri porta pa e kompartí esaki tur kaminda ku e ta pasa.
Resultado relevante
E parti di bienestar Vanessa ta keda kapasitá su mes. El a bisa ku di su trabou e ta traha komo ‘team builder’ i coach i ta traha a base di funshonamentu. Kon e ta hasi ekipá su mes pa lusi mas den su trabou i yega na su metanan. E ta a base di resultado. Ta importante pa realisá ku e resultado no ta mashin nos ta pero e ser ku tin di produsí e resultado ta relevante. I di e ser humano tiki tiki ta krese i bai pa ripará ku no mester inspirá e individual so pero e probecho máksimo lo saka si komo organisashon, komunidat i pais por yega na kon mas por kana e kaminda huntu pa nos tur ta bon. Esei ta e futuro mas ku nunka.
E nesesidat ta alarmante
E nesesidat awendia ta ekstremadamente grandi. Palabranan manera burnout, strès no ta nada nobo. E ta representá e nesesidat grandi ku tin rònt mundu. Komo ser humano e nesesidat tei. Tur profeshonal por indiká esaki ku e sifranan ta alarmante. I nos tin di konsentrá di influensia kaminda kada ken por yuda. Wak bo sirkulo direkto manera pa koleganan di trabou i yuda.
Buska yudansa profeshonal
E tópiko aki ta unu amplio. Pero e konsepto di ta konsiente ku bo tin rienda den bo mes man. E ta wak na su mes e bia nan ku el a pega den e proseso di bida. Ta konsiente unda bo ta bai, inventarisá unda bo ta pará den bida i kiko ta funshoná òf no i tuma kurashon di hasi kambio i mehorashon pa kumbiní bo mes. I wak pa e organisashon ku bo ta forma parti di dje ta unu positivo i ku bo ta kontribuí na bienestar di e tim i e trabou. Nos tin di hunga e wega di bida, e bida ku nos ta biba aki, lanta para i biba e bida na nivel di un ‘top sporter’, bira responsabel i para ku orguyo pa nos bienestar. I para pa e yudansa ku mester òf un área ku bo ta ménos bon den dje i buska un profeshonal pa yuda. I di e forma aki bo ta biba largu, ku satisfakshon i ku propósito den bida.
