WILLEMSTAD.- For di e parti inisial di siglo pasá e historia di Kòrsou i tambe su ekonomia tabatin relashon estrecho ku Madeira i su hendenan. Por bisa ku hopi di nos empresarionan eksitoso ta desendientenan di imigrantenan for di Madeira ku den e siglo pasá a bini Kòrsou en buska di un mihó bienestar. Si sigui wak dilanti atrabes di e 75 añanan i hopi hende di e di dos generashon a kontinuá e pasonan di nan mayornan, ekspandiendo negoshinan ku nan mayornan a kuminsá i asina kontribuyendo di un forma supstansial na ekonomia di Kòrsou i su hendenan. Asina e presidente di VBC, sr. Tarzeno Cirkens, a trese dilanti na okashon di un almuerso organisá na okashon di bishita di e presidente di Madeira, sr. Miguel Albuquerque.
Segun sr. Cirkens, ta e espíritu empresarial, e kompromiso aki pa un mihó futuro pa nos nos mes i nos yunan, e determinashon aki ta loke nos mester surpasá pa bira eksitoso sin importá, ta esei ta loke nos tin mester den e tempunan di insertidumbre aki. I si nos wak estadístikanan, Kòrsou su ekonomia a bin ta eksperensiá un kresementu di tres sero i negativo durante e último binti aña.
I ku e pandemia ku nos a konosé na mart 2020 e situashon a bira pió, ora ku nos a konosé un kontrakshon ekonómiko di 18.4% den 2020. Den plaka nos produkto bruto doméstiko a kontraé ku 0.9 mil mion, di 5.4 mil mion den 2019 pa 4.5 mil mion na 2020. Durante 2021 esaki a rekuperá ku solamente 4.2%.
Segun Cirkens, e puru realidat ta proba ku komo pais, gobièrnu, sektor privá i sindikatonan mester hasi muchu mas pa yuda alsa e kalidat di bida di nos siudadanonan. Si sigui apliká e mesun strategianan finansiero i ekonómiko lo no trese e desaroyo ekonómiko ku tantu nos tin mester pa bai dilanti. I nos mester realisá ku e insertidumbre mundial a krese dramátikamente te na sierto límite ku nos ta eksperensiando un inflashon haltu i ta konfrontando asta un reseshon global ku na su turno lo afektá e kresementu ekonómiko negativamente.
Preisnan di kuminda i energia ta subiendo drástikamente tur kaminda na mundu i esaki ta poniendo mas preshon riba e gastunan operashonal di kompanianan lokal i tambe e forsa di kompra.
Sueldo mínimo:
Pa loke ta e punto di sueldo mínimo, sr. Cirkens a duna di konosé ku VBC ta konkluyendo su posishon pa loke ta e proposishon pa subi esei, i pronto lo informá gobièrnu di esei. El a primintí ku den esaki tambe VBC lo ta positivo, práktiko i ku e intenshon di tin un impakto positivo tantu pa esun ku sueldo mínimo komo pa e ekonomia den su totalidat, pa término korto, mediano i largu. I e úniko manera pa trese adelanto pa nos ekonomia ta di hisa prosperidat pa tur hende, dor di hasi kosnan diferente pa asina tin resultado faborabel. Si nos sigui hasi e mesun kos i spera un resultado diferente ta loke Albert Eistein a yama “Insanity”.
Segun Cirkens, desafortunadamente hopi biaha VBC ta ser mirá komo un oponente en bes di un partner den komunidat. Ketu bai VBC ta ser inkluí, aunke no sufisiente, den diskushonnan importante pa loke ta regardá futuro di nos “Dushi Kòrsou”.
