CARACAS, AP.- E gobièrnu di presidente Nicolás Maduro a deklará e embahador di Spaña na Caracas, Jesus Silva Fernandez, komo persona non grata. Esaki a pasa despues di e komentarionan di e pais Ibériko riba e polítika interno di Venezuela i e sanshonnan di Union Europeo kontra shete funshonario di e nashon suramerikano.
E kansier Jorge Arreaza a anunsiá e medida den un komunikado ku a wòrdu dibulgá riba su kuenta di Twitter, habriendo un kapítulo di frikshon nobo entre Venezuela i Spaña. E gobièrnu venezolano a pidi konsultanan ku su embahador, Mario Isea, na Madrid.
Arreaza no a presisá kiko ta e konsekuensianan di e deklarashon aki, ounke e por ta e paso inisial pa ordená salida di e embahador ibériko di e pais pronto.
E minister spañó di Eksterior, Alfonso Dastis, a bisa den deklarashonnan di prensa na Davos, Suisa, ku su pais lo rospondé ku “medidanan resíproko proporshonal” i a informá ku lo diskutí di vários posibilidat den e reunion semanal di e gabinete di gobièrnu spañó djabièrnè.
Segun e dokumento, Venezuela ta rechasá e deklarashonnan di presidente di gobièrnu spañó kategorikamente. Esaki ta relashoná ku sanshonnan europeo kontra shete funshonario akusá di abusu kontra derechonan humano òf di violá e estado di derechi.
