Willemstad- Despues di hopi warda, porfin VivaKids Recycleband por anunsiá ku hopi orguyo, e lansamentu ofisial di un kansion nobo i su videoclip pa tur nos muchanan di Kòrsou, Aruba i Boneiru.
E kansion akí ta entitulá ‘Bail’e Kachó’. ‘Bail’e Kachó ta un kansion ku a keda skirbí di forma masha espontaneo dor di e muchanan di VivaKids Recycleband mes, huntu ku Omar Sling. Nheiyo Sling ta e integrante di Vivakids ku ta interpretá e ‘Bail’e Kachó’, den kua e ta konta di e amor inkondishonal entre un tata i su kachónan di kas i ta kanta di diferente karakterístika ku hopi bia nos tambe ta rekonosé den nos kachónan na kas. ‘Bail’e Kachó’ den un forma masha rítmiko i alegre sigur lo pone grandi i chikí move i gosa huntu ku nos muchanan di VivaKids Recycleband. E videoclip ku a keda produsí huntu ku e kansion di ‘Bail’e Kachó”, ta forma parti di e prueba final ku e muchanan ta pasa pa sera e periodo i tèst nan kresementu i desaroyo di nan abilidatnan. Kada periodo, ta konsistí ku e muchanan ta wòrdu guiá den traha i siña toka un kantika nobo, graba esaki den un studio di produkshon i por último graba esaki su videoclip.
VivaKids Recycleband ta un proyekto ku e artista multi talentoso, Omar Sling a inisiá na aña 2017. Di forma kompletamente grátis, e muchanan di Vivakids Recycleband ta bini huntu tur djasabra den Atelier Omar Sling i no solamente ta toka i kanta, pero tambe ta siña di e importansia di resiklahe i nos medio ambiente, arte, formashon i kultura. Di e forma akí, Omar ta invertí i duna bèk na nos komunidat. E meta ta, pa sigui invertí i ekipá e muchanan akí mas tantu posibel di moda ku mañan nan tambe por sigui karga e pais akí pa dilanti.
Mirando ku VivaKids ta un proyekto grátis, nos ta inmensamente gradisí di por a bolbe konta ku e apoyo i yudansa di diferente persona i instansia pa por a logra produkshon di e kansion i videoclip akí. VivaKids Recycleband ta yama un danki di kurason na entre otro Samenwerkende Fondsen, RBC Bank, EWT, Esperamos Supermarket, Mangusa Supermarket, BoFrei Agencies i Coca Cola pa a invertí den realisashon di e proyekto akí. Aparte di e spònsernan akí, Vivakids a konta tambe ku aporte sumamente spesial di Water Fun Party Curaçao, D’Art, Grupo di Teater ‘Kishikí’ i XG; hopi danki pa kere den nos muchanan.
Tambe, VivaKids tabatin e dicha di por a konta ku e yudansa di masha hopi persona super great ku di un forma òf otro a duna un man durante henter e produkshon di e videoclip di ‘Bail’e Kachó’. Masha masha Danki, boso aporte di bèrdat tabata super balioso pa nos.
Abo tambe por disfrutá di e videoclip di ‘Bail’e Kachó’ tantu riba e Youtube komo e página di Facebook di Vivakids Recycleband. Mas ku klaro ‘like’ e videoclip i sigui kompartí esaki i asina sostené Vivakids den e bunita i humilde proyekto akí ku nos ta hasi ku hopi amor pa tur nos muchanan.
