WILLEMSTAD – Awe den oranan despues di mèrdia, Wardakosta a interseptá un boto ku a kaba di yega for di laman grandi. Ta trata aki di un boto di piskadó ku lo mester a bai tuma un kargamentu di piska riba laman grandi i trese esaki pa merkado lokal. Sentral di Wardakosta tabata vigilá e movementu di e boto aki pa basta ratu kaba. Riba laman un metalshark di Wardakosta a interseptá e boto i guia esaki pa drenta Spaansewater i bai direkshon di haf di piskadó na Caracasbaai.
Einan a start un kontrol riguroso huntu kue Kuerpo di Duana riba e boto. Durante e kontrol a bin dal den un kantidat grandi di paki di droga skonde. Mesora outoridatnan a detené e dos tripulantenan di boto aki. Ámbos a keda hiba warda di polis pa inisiá e proseso di investigashon i interogashon. E boto karga ku droga a keda hiba na e base di Wardakosta na Parera unda lo kontinuá ku e investigashon riba e boto i tambe wak kuantu e kantidat di droga konfiská ta. E boto ta un ku registrashon lokal pero ku no ta para na e haf di Caracasbaai. Ainda no tin e informashon ofisial ta kuantu e kantidat di droga ta papia aki di dje.
