WILLEMSTAD.- Fundashon Hende-i-Ambiente (HiMA) pa basta tempu ta lucha pa tur famia na Kòrsou tin akseso na awa limpi. Segun Yvonne Wolthuis-Olf di e fundashon, wes na Kòrsou djaluna último a manda un invitashon pa ámbos partido – gobièrnu i e fundashon – ta bin korte pa un deliberashon. Esaki lo tuma lugá 20 di febrüari otro aña. Wolthuis-Olf ta kontentu ku e desishon di wes.
Segun e inisiadó di fundashon HiMA esaki ta un paso nobo den e trayekto grandi. “Ta mi intenshon ku via korte nos lo obligá gobièrnu pa sòru ku tur famia na Kòrsou tin akseso na awa limpi. Segun nos, mas ku 4000 persona na Kòrsou awor, pa tempu largu òf kòrtiku, no tin akseso na esaki. Nos ta urgi gobièrnu pa bin ku un plan. Den e plan gobièrnu tin ku splika kon nan lo sòru ku den futuro lo no tin niun mucha òf adulto na Kòrsou mas ku no tin awa limpi.”
Te ainda gobièrnu no ta habri pa papia ku e fundashon, segun Wolthuis-Olf. Dos abogado di gobièrnu resientemente a manda un karta na wes. Den e karta nan ta skirbi ku gobièrnu ta hasi sufisiente pa sòru ku tur hende na Kòrsou tin akseso na awa limpi. Segun e abogadonan gobièrnu no ke bin ku un plan òf un maneho nobo. Fundashon HiMA ta lamentá esei.
E desishon di wes pa invitá e dos partido pa bin korte dia 20 febrüari 2023 pa un deliberashon (un ‘comparitie’) ta algu positivo, segun Wolthuis-Olf. “Nos lo prepará nos mes hopi bon pa esaki.” Wolthuis-Olf no tin un abogado pa e kaso, e mes a entregá e kaso i ta hasi e pasonan hurídiko.
Resientemente tòg el a haña sosten di algun hurista. Defence for Children, huntu ku Nederlands Juristen Comité voor de Mensenrechten (NJCM), tambe ta lucha pa e mesun kousa. E dos organisashon ta di opinion ku gobièrnu di Kòrsou tin ku tuma mas inisiativa pa sòru ku niun famia na Kòrsou ta keda sin awa limpi. Pa kambia e situashon nan a kuminsá un kaso kontra ‘de Staat der Nederlanden’, ku ta responsabel pa abitante di Reino Hulandes. Huristanan di NJCM ta sostené lucha di fundashon HiMA.
Wolthuis-Olf: “Mi ta hopi kontentu ku e sosten. Meskos ku mi ta kontentu ku Ombudsman resientemente a entregá un proposishon na minister di Desaroyo Sosial, Labor i Bienestar, ku e meta pa sòru ku awa limpi ta disponibel pa tur hende. Pero mi no ke ku nos ta pèrdè mas tempu. Gobièrnu a ninga di sòru pa un parti di nos poblashon pa basta tempu. Tin hende ku ta biba sin awa pa mas ku 8 òf 10 aña. Pa e hendenan ei mi ta sigui ku e lucha i mi ke yega na un resultado mas lihé posibel.”
