Pamela Jimenez; Wowo (fundashon Wak Otro)

Fundashon Wak Otro a lanta pa konsientisá nos pueblo riba enpartikular proyektonan ku gobièrnu ta ehekutá. Por duna opinion, sea ta pro òf kontra. E fundashon ta trahando riba un App ku lo keda kla den luna di Mei i asina ta kuminsá ku manera nan ta bisa “een schone lijst” di proyektonan di gobièrnu nobo. Pamela Jimenez a duna mas detaye di e fundashon. Meta di e fundashon ta pa informá pueblo di un manera fásil, lihé i struktura riba desishonnan di gobièrnu. Tambe kosnan ku no ta desishon di gobièrnu pero ku parlamentarionan ta proponé. Esei ta e meta ta pa ta bon informá i kaminda pueblo por partisipá i bisa si nan ta pro òf kontra di desishonnan andando. I teniendo na kuenta ku nos ta evitá den e programa di Djasabra pa drenta den polítika mas tantu posibel. Jimenez a aklará ku e fundashon no ta afiliá na niun partido i nan no ke ta afiliá na niun tampoko. Nan ta invitá tur partido pa ta parti di Wowo esta un App pa haña tur informashon i kada polítiko tin nan profil riba e app aki.

Un tiki di Pamela

Pamela Jimenez a gradua na 2013 aki na Kòrsou na Radulphus College i a bai Hulanda. Einan a siña akountansi i finansa i despues a hasi master na Erasmus i a traha 3 aña na PWF Rotterdam i na 2021 el a regresá Kòrsou despues di 8 aña.

Otro for di media sosial

Wowo ta funshoná otro for di media sosial. I esei ta netamente e intenshon. Nan ke ta hopi basá riba echo i mas riba e kontenido publiká. E parlamentarionan i fundashonnan i usuarionan no por publiká nan kontenido pero ora nan ke pone algu riba nan perfil e ta bai via di e tim di Wowo. Artíkulonan publiká ta traha pa e tim di Wowo mes. Riba kada artíkulo por vota pro i kontra. I usuarionan por duna un proposishon, solushon òf alerta.

Meta

Pamela a bisa ku hopi bia hende no sa kon pa yega na nos representantenan. Kisas un palu di lus a kai den bario òf tin algu pasando por ehèmpel Caracasbaai ora ta drùk mainta òf atardi i bo por bin ku un solushon i trese na nos representantenan. I den e di dos paso bo ta yena formulario i entreg’é na Wowo i nan lo chèk si ta kontenido bálido i ta pone riba aplikashon. Hendenan por like i vota kuantu e aspekto aki ta afektá nan. Duna hopi informashon segun datonan. I esaki ta algu ku den media sosial bo no sa presis ku kuantu hende e ta keda afektá. E ta mas strukturá. E kontenido i e representantenan ta inkluí un ‘timeline’ kaminda por wak un trayektoria di nan aktonan durante di añanan. Ta difísil pa keda mantené nan akshonnan al dia. E perfil ta un indikashon di loke nan a hasi tambe ta bin. I esaki semper den komunikashon ku e representá mes. Por kompar’é manera deporte kaminda ta wak un  lista di echonan di e deportista ku a saka tantu gol esta e perfil di e persona i esaki ta loke Wowo ke logra ku e perfil di e representantenan. Asina ora e persona bai vota, e no ta hasié pa un tim pero e ta bai vota pa trese huntu un tim pa hiba Kòrsou dilanti pasobra e sa kada persona den e tim su trayektoria.

Den e app hende por like i duna komentario i asina komunikashon direkto. E ta otro for media sosial pasobra bo no ta traha post, bo no ta post bo potrèt i opinionnan. Personanan por wak artíkulonan i solushon i alerta ku e usuarionan ta trese dilanti. I ora haña e pro i kontra i posibel segun Pamela nan tin dos kos; na promé lugá e usuario ta duna su opinion i asina e representante di pueblo ta wak kiko un mayoria lo ke i kiko no ke. I na di dos lugá e pro i kontranan ta privá, ke men otro hende no ta wak kiko bo a vota òf no. Uniko kos ku lo wak ta 70% pro òf kontra. E ta protehá e usuario pasobra tur hende lo wak kiko bo a vota i ta bin kisas un konflikto òf konfrontashon dikon e usuario a skohe pa e opinion ei. Nan ta laga we resultado reflehá e bèrdat pasobra nos ta den demokrasia. I e pro i kontra lo usa pa un sistema pa chèk kon bo ta pará komo representante. Esaki ta hasi den e Tape di bo uso i kompar’é ku un representante di pueblo i e ta duna bo komo resultado kiko bosnan dos tin meskos. Pamela a bisa ku nan ke pa e representantenan vota riba e app.

App despues di elekshon

E  app ta den desaroyo. Tin e diseño i e wèpsait ku ta wowo.today. Nan ke lansa pa mei 2025, despues di elekshon. Nan ke tin e pre-lansamentu pa elekshon i pa lans’é mes despues di elekshon i asina ta kuminsá ku un lista limpi ku kontenido. Awor aki nan tin vários tópiko riba Instagram pero no tin e app mes.

Konsiso, strukturá, fásil i lihé

E idea pa bin ku fundashon Wowo segun Pamela a nase un aña  pasa na òktober. Tabatin hopi kos di deporte andando den zomer 2023 ku world cup, Euro cup i si wak kuantu informashon tin di kada hungadó kon e personanan ta analisá i bisa kua ekipo lo bai gana. I pensando riba elekshonnan ta bon pa sa e informashonnan ei di nos representantenan. Bai pa un ekipo ku ta sòru pa tur nos prioridatnan na promé lugá. Tambe e parti ku Pamela mes no tin tempu pa sigui hopi kisas riba radio pasobra bo ta sea na trabou òf algu asina i tòg no ta interesá. I tambe kon por partisipá na un manera ophetivo i konstruktivo i duna opinion sin di pone asina tantu esfuerso manera kosnan konfliktivo manera riba media sosial. Riba media sosial por wak ku e diskushonnan ta bai hopi leu i asta ta desviá for di loke e tópiko mes ta. Tin un nesesidat pa algu hopi konsiso, strukturá, fásil i lihé. Mester yega un kaminda ku por duna un komentario sin ku e ta bira un diskushon i ser konfliktivo.

Fondo

Desaroyo di un Aplikashon APP ta algu bastante kostoso. Pamela a bisa nos ku nan fundashon awor aki ta trahando riba nan mes forsa ku boluntarionan. Nan ta duna nan tempu i esfuerso i tin kos nan mes a finansiá. Tambe enkuestanan durante karnaval nan mes a hasi. Nan a haña un donashon pa algu pero nan mester di 75 mil florin. Nan ta 4 persona den e tim, di kual un desaroyadó di un app. Nan ke purba hasié pero ke yudansa di mas persona pa yega e meta di mei na tempu. Nan ta boluntario i tin nan trabou i ta hasié anochi òf den wikènt. I pa nan logra yega na Mei, nan ke mas persona pa por logr’é. Nan a hasi petishon na diferente fundashon i pa asina por yega na fondonan. I nan no ta importá ku ta montante grandi òf chikí pero por kaba e aplikashon. Nan ke un tik di kual 2 persona ta traha riba un tópiko i otro ta investigá pa asina por wak si e informashonnan ta bèrdat i verídiko. I p’esei nan ta buska hóbennan o personanan ku a retirá por ehèmpel  for di periodismo i ku tin konosementu pa funshoná komo boluntario. Te ainda nan ta boluntario pero ta asina ku e app lo mester funshoná despues pa por paga tur e hendenan ku ta traha pe. Riba e app lo bin propagandanan pero no polítiko pero pa yuda paga e gastunan.