Polis ta konfirmá víktima den tráfiko; Wladimir Humphrey Anacleto Alberto
Update: WILLEMSTAD - Djaweps 20 di desèmber 2018, alrededor di 03.30or un patruya polisial ku tabata kore riba brùg Juliana di Otrobanda direkshon Punda a topa ku un aksidente entre (2) motosaikel ku ku dos (2) herido. For di un investigashon preliminar ku polis a realisá na e sitio, a sali na kla ku un shofùr di un di e motorsaikelnan a para ku su motorsaikel riba brùg ku konsekuensia ku shofùr di e motorsaikel ku tabata biniendo su tras a dal den dje. Dor di e impakto un di e shofùrnan a fayesé na e sitio i e otro a keda transportá ku ambulans pa Poli di SEHOS den un situashon di preokupashon. Alrededor di 04.35or dòkter di polis a konstatá morto di e motosiklista, e hòmber Wladimir Humphrey Anacleto Alberto, nasé Kòrsou dia 13 yüli 1979. WILLEMSTAD.- Den e fin di aña aki tin otro morto den tráfiko, den e kaso aki ta trata di un aksidente kaminda tin dos motosiklista embolbí. Bosero polisial sr. Zimmerman a konfirmá pa EXTRA ku awe mardugá pa mas o ménos 03:30 am a sosodé un aksidente di tráfiko riba brùg Juliana. E bosero polisial a informá ku ta trata di dos motosiklista. Departamento di tráfiko di polis a saka afó ku e motibu prinsipal ta velosidat haltu. E informashon suministrá ta indiká ku e koredó di motersaikel ku awor aki ta den situashon kritiko tabata biniendo patras i a bai dal den esun su dilanti. E konsekuensia ta ku esun ku tabata kore dilanti a pèrdè su bida. Manera indiká, un di e personanan a fayesé na e sitio miéntras ku e otro a keda transportá pa Poli den un situashon hopi delikado. Forsa na famia dje defuntu.