WILLEMSTAD.- Abitantenan di Piscadera ta bati alarma atrobe despues ku den fin di siman a bolbe tuma nota di destrukshon di palunan di mangel atrobe durante di e trabounan di konstrukshon di un resort na Zakitó. Manera ta konosí e abitantenan a inisiá ku un petishon ‘online’ pa para e proyekto aki.
Banda ku ta mata e palunan di mangel e abitantenan ta bisa ku konstrukshon di un marina i un “golfbreker” ta mata koralnan bou di laman. Den un komunikado di prensa gobièrnu a informá ku ta for di mei 2023, gobièrnu a hasi entrega di diferente pèrmit na e kompania Royal Holding Company II B.V. den kuadro di desaroyo di un marina pa yate den área di Zakitó.
E kompania lo por bai traha un ‘golfbreker’ i un brùg ku por move, konforme Kòrsou su leinan riba e tereno di maneho marítimo (“Landsverordening Maritiem Beheer”), i di konstrukshon i bibienda (“Landsverordening Bouw en Woningverordening”).
Minister di Salubridat, Medio Ambiente, i Naturalesa tambe, na e okashon aki, a otorgá alabes un eksonerashon konforme nos leinan lokal pa loke ta maneho di ref (“Rifbeheersverordening”) pa e konstrukshonnan ya menshoná. Pues e desaroyadó mester tene kuenta ku tur regla vigente. Tambe mester kuida e palunan di mangel.
Fundashon Pro Monumento (ProMo) i Amigu di Tera (AdT) den kuadro di e trabounan ku ta tuma lugá a entamá un kaso atministrativo, kontra vários aspekto ku na nan opinion no ta korekto ku e proyekto aki. Korte den su sentensia a rechasá tur e puntonan di opheshon ku ProMo i AdT tabatin kontra di e proyekto.
Ku esaki e desaroyadó nan esta Royal Holding tin lus bèrdè pa sigui konstruí e proyekto, na e momentunan aki. Banda di un seri di reklamo ku tabatin kontra di e proyekto, e kaso tabata dirigí riba algun punto prinsipal, esta e maneho di e Laguna i tambe e brùg ku ta move ku na opinion di e demandantenan, lo no ta sufisiente fuerte pa un vehíkulo di Bombero pasa ariba.
E aspekto di pone un ‘golfbreker’ tambe tabata forma parti di e disputa.
