Na St. Maarten
W’STAD/PHILLIPSBURG.- Kandidato pa minister Raeyhon Peterson ta preparando un kaso den korte kontra gobernadó di St. Maarten Ajamu Baly. Esaki pa motibu ku Baly ta nenga di manda su dekreto aden pa firma.
Baly siman pasá a saka un komunikado bisando ku 7 minister di gabinete Mercelina ta hura 3 mei. Esaki ta inkluso e minister plenipotensiario i e minister plenipotensiario suplente.
E komunikado di Baly a lanta hopi konfushon i spekulashon. St. Maarten tin 7 ministerio, pues mester nombra 7 minister plùs e minister plenipotensiario i minister plenipotensiario suplente ta tota 9 kandidato ku mester hura dia 3 awor.
Formadó di St. Maarten, Luc Mercelina den un komunikado pa aklará e publikashon di gobernadó ta bisa ku el a entregá 9 nòmber di kandidatonan pa minister. Peterson ta kandidato pa e puesto di minister di Bibienda Popular Planifikashon Urbano, Medio Ambiente i Infrastruktura.
Gobernadó a informá sinembargo ku Veronica Jansen-Webster banda di asumí e enkargo di minister di Salú Públiko, Desaroyo Sosial i Labor lo asumí alabes enkargo komo minister interino di Bibienda Popular Planifikashon Urbano, Medio Ambiente i Infrastruktura. Baly a base di un kaso den korte den pasado ta nenga di manda e dekreto di Peterson aden pa firma.
Ta trata di un kaso di un aksidente den tráfiko kaminda Peterson a sali liber di tur akusashon relashoná direktamente ku e aksidente. Pero debí na un aliterashon ku a tuma lugá na e sitio di aksidente Korte di Apelashon pa a sentensia Peterson, pero no a dun’é un kastigu.
E sentensia ta pasobra Peterson lo a pusha un persona na e sitio di aksidente. Ta trata pues di un kaso un tiki paresido na lokual a tuma lugá na Kòrsou ku kandidatura di Eduard Braam pa bira minister.
Mirando ku Braam a bai korte i Korte di Apelashon a disidí ku no por a stroba Braam pa bira minister, Peterson tambe ta di opinion ku a base pa stroba su kandidatura. Ta den e kuadro, segun EXTRA por komprondé ku Peterson ta preparando huntu ku su abogadonan pa un kaso den korte.
Tin un di dos kandidato pa minister, Christophe Emmanuel ku tampoko gobernadó Baly no ke manda su dekreto aden pa firma. Esaki pasobra Ministerio Públiko ta indiká ku tin investigashonnan ta andando rondó di su persona.
Pero no tin klaridat te ainda ta investigashon relashoná ku kiko. E situashon aki por bira otro kaso den korte relashoná ku e proseso di un formashon di gobièrnu na St. Maarten.
Emmanuel ta kandidato pa bira minister di Enseñansa. Gobernadó den su publikashon a bisa minister di Hustisia, Lydon Lewis lo ta alabes minister interino di Edukashon, Kultura, Hubentut i Deporte.
Eks minister di Salubridat Públiko, Omar Ottley tambe mester a warda mas ku 1 aña pa e bira minister pa e motibu aki. Ministerio Públiko e tempu ei a indiká ku ta hasiendo investigashon rondó di su persona.
Ottley a bai korte pa eksigí klaridat di investigashon riba kiko i si e ta un sospechoso òf laga. Den korte a sali na kla ku Ottley mes no tabata sospechoso i ku tabata investigá personanan yegá na dje.
Korte konsekuentemente a ordená ku no por stoba Ottley pa bira minister.
