WILLEMSTAD.-Áwaseru ta kai ménos último simannan i por nota ku e kantidat di awa den e dam na Muizenberg tambe ta bahando. Por mira ku tin ménos moveshon di hende i bestianan manera flamingo den e área aki kual tabata un atrakshon pa hopi hende lokal den oranan di mainta tempran i atardi. Sin embargo e kantidat di sangura i otro insekto pa abitantenan si ta insoportabel. Abitantenan ta konta EXTRA ku tur atardi nan mester un bleki di insektisida kompletu pa nan por haña trankilidat di sangura den nan kas.
E kokolishinan grandi tambe nan tabata piki hopi tur mainta i basha salu riba nan. Awor por mira ku e kokolishinan ta mas chikitu kompará ku e grandinan ku nan tabata topa kuné. Vários abitante a buska kontakto ku GGD pero via telefòn ta imposibel pa logra haña komunikashon. Esnan ku tin kualke kontakto via via tambe ta purba pero simplemente no ta haña atenshon di GGD pa wak si akaso tin algu ku por hasi pa kontené e gran kantidat di sangura i otro insekto ku ta asotá e barionan rondó di e dam di Muizenberg. Di e forma ei nan a aserka EXTRA ku e petishon pa wak si asin’aki nan por haña oido.
