For di awe 6 di mei
WILLEMSTAD.- Dia 5 di mei último na Kòrsou a rekordá morto di Helmin Wiels. A asesiná lider polítiko di partido Pueblo Soberano dia 5 di mei 2013 riba playa di Marie Pampoen. Dia 6 di mei 2024 emisora hulandes BNN/Vara ta presentá un ‘podcast’ tokante e asesinato. Pa e ‘podcast’ periodista Nastasja Gibbs a bin Kòrsou. Segun e emisora hulandes BNN/Vara Gibbs a bin Kòrsou pa buska kontesta riba e siguiente preguntanan: ‘Kiko ta e historia tras di e asesinato di Helmin Wiels? Pa ki motibu Wiels mester a muri? I pa ki motibu hopi hende riba e isla te ainda tin miedu pa papia tokante e asesinato?’
A traha seis episodio di un podcast, ku ta yama ‘Wiels de moordzaak’. Gibbs ta bisa tokante e dia di asesinato: “Mi ta kòrdá tur e kosnan di 5 di Mei 2013 hopi bon. Mi tabata traha komo koresponsal na Kòrsou. Apénas dies kilometer leu for di e lugá di e asesinato, mi a risibí un yamada di un kolega ku a mira e suseso ku su propio wowo. E asesinato a mantené e isla bou di un situashon di tenshon pa hopi tempu i tambe e kaso di asesinato nunka a laga mi. Pasobra kon ta posibel ku tres hende a wòrdu arestá pero ku ainda no tin nada konosí tokante e motibu? Bo ta kere ku na un isla asina chikitu manera Kòrsou, ta fásil pa haña kontesta. Pero hopi biahá pasobra e isla ta asina chikitu, hende tin miedu pa papia.”
Emisora BNN/Vara algun dia pasá a manda dos episodio di e podcast na prensa. For di 6 di mei tur hende por skucha tur 6 episodio di e podcast na BNNVARA via e grátis ‘NPO Luister-app’.
Den un komunikado di prensa BNN/Vara ta splika e importansia di e asesinato: “Helmin Wiels a wòrdu asesiná mas ku dies aña despues di e asesinato di Pim Fortuyn n Hulanda. E asesinato di Fortuyn ta keda grabá den memoria di hopi hulandes i no solamente a kambia e klima polítiko, pero tambe e sosiedat kompletu di forma duradero. Manera Fortuyn, Wiels tabata un polítiko markante ku su deklarashonnan radikal i su rebelion kontra e struktura polítiko i kultura predominante. Na e momentu ku Helmin Wiels a wòrdu asesiná, e tabata e lider di e partido polítiko mas grandi na e isla i un hòmber ku hopi amigunan i siguidó. Pero sigur tambe ku hopi enemigunan. Den e serie di podcast, Natasja Gibbs ta buska kontesta. El a biahá pa Kòrsou, a papia ku famianan di e víktima i personanan inkriminá i ta hasi tur kos posibel pa logra papia ku e eks-minister di Finansa George Jamaloodin, kende a haña sentensia di 30 aña di prisòn komo instigadó di e asesinato aki.”
