WILLEMSTAD.- ABVO a organisá un seminario riba “The future World òf Work” esta e trabou den futuro. I den e kuadro aki e sindikato ta trahando pa konsientisá su miembronan kon traha den e era nobo i pa keda den kontakto ku nan.
George Hernandez presidente di ABVO den deklarashon na EXTRA a bisa ku manera mundu ta bai, e manera di traha ta kambia i komo sindikato mester prepará bo mes i bo miembronan pa e kambio di digitalisashon ku tin.
I p’esei ABVO a invitá diferente orador manera Adrie Williams, sr. Sluis, sra. Neysa Isenia i sr. Ignacio ku a duna un bista di e diferente ángulonan di trabou di futuro.
Importante ta pa nan konsientisá nan miembronan kon prepará nan mes pa e kambionan ku ta bin i e manera ku mester bai traha. E plataforma di digital kaminda hende por sinta na su kas i traha i e parti di efisiensia di traha, kaminda den futuro gobièrnu ta bisa asta ku trahando na kas por spar sèn ku hür di edifisio i koriente, nan komo sindikato mester ta konsiente di dje. Tambe mester ta konsiente di e rísikonan ku tin. P’esei e seminario ku a tuma lugá henter dia ayera ta pa duna informashon i pa asina e sindikato por yega na un strategia pa den futuro komo sindikato kon mester sigui.
Pa futuro sr. Hernandez a bisa EXTRA ku nan komo sindikato di 86 aña mester traha pa tin 86 aña mas di eksistensia i esaki nan lo hasi dor di prepará pa e futuro trabou i kon ta sòru pa miembronan keda miembro tambe di e sindikato, teniendo na kuenta ku trahando for di kas tambe por stroba e kontakto ku e sindikato.
