WILLEMSTAD.-Malechornan un biaha mas a purba rementá ATM pa asina hòrta e kontenido.
Ayera den kareda di kuartu pa kuater di mardugá, sentral di polis a risibí informashon ku malechornan ta purbando na bula un mashin outomátiko di plaka ATM situá pegá ku Arco Iris Supermarket riba Kaminda Hensley Meulens. Nan a purba esaki hasiendo uso di un silender chikí di gas i tambe un slang ku nan a konektá for di e silender i bai na e mashin outomátiko di plaka ATM. A pega esaki na e lachi kaminda sèn ta sali.
Remarkabel ta ku den pasado malechornan ya a yega di purba rementá e mesun mashin outomátiko di plaka ATM aki, pero no a logra. Durante nan intento posiblemente algu a bai robes i a bandoná e sitio.
Na momentu ku polisnan a presentá na e sitio, a sera e área kompletu primeramente pa seguridat mirando ku tabatin posibilidat ku e bòm di gas lo por a eksplotá i tambe pa por realisá e investigashonnan nesesario. E malechornan no a logra rementá e mashin, pero si a kousa destrukshon. Keho a keda entregá i reshèrshinan ta kontinuá ku investigashon.