WILLEMSTAD.- Na lugá di a eksonerá 3 miar florin di debe di impuesto na personanan ku tin moda pa paga esaki, gobièrnu mester a hasi esfuerso pa kobra e debenan aki i ku e sèn paga debe di 4.200 kas di famia ku ta deskonektá di awa. Asina kolaboradó di frakshon di MAN, Eugene Cleopa ta opiná.
“Mi no ta komprondé kon di un banda ta permití ku ta kòrta awa di 4.200 kas pa di otro banda e mesun gobièrnu di MFK i PNP ta eksonerá 10 mion florin na debe di impuesto grupo grandi hende ku por paga. Si e gabinete aktual ta pretendé ku e tei pa pueblo i ku pueblo, esta ku su meta ta pa yuda e poblashon di Kòrsou, e pregunta ta kiko ta pasa ku no ta yudando esnan ku no tin awa”, Cleopa ta bisa.
Segun Cleopa por a spera ku maneho di e gobièrnu lo tabata entre otro pa garantisá ku tur siudadano tin awa pa bebe, baña, limpia kas i laba paña kuné. “Awa ta un nesesidat básiko. Hende no por biba sin awa.”
Pero e ta sinti hustamente falta di un maneho sosial. “Kiko gobièrnu di MFK i PNP su maneho sosial ta?”
Un gobièrnu ku no ta hiba un maneho sosial pa protehá esnan mas ta den nesesidat ta kruel i inhumano, Cleopa ta sigui bisa. “E mesun gobièrnu aki ta aprobá un karchi di krédito di 15 mil dòler pa ministernan por biaha kuné.”
Esaki ta pruba pa e kolaboradó di frakshon di MAN ku e aktual gobièrnu ku ta yama su mes sosial su akshonnan definitivamente no ta sosial.”
Segun Cleopa e gobièrnu mester a kobra mas tantu ku ta posibel e plaka na debe di impuesto ku i usa e sèn aki pa kubri gastu di awa di esnan ku no por paga i alabes guia nan riba uso di awa i koriente di forma responsabel.
E kolaboradó di frakshon di MAN ta lamentá ku apesar ku kompania di awa i elektrisidat, Aqualectra a introdusí meternan smart pa yuda ku uso responsabel di awa i koriente, e guia aki no ta destiná pa esnan ku mas mester di dje. “E grupo ku mas mester di ayudo ta esnan ku mas ta lucha tambe kontra oumento di tur otro gastu manera preis di kuminda i kombustibel ku ta sigui subi.”
