Minister Pisas a inventarisá daño na playanan:
WILLEMSTAD. – E fotonan ta papia pa nan mes. Un destrukshon formal áwaseru a laga atras den área di Banda Abou djasabra último, prinsipalmente playanan. Esaki ta motibu ku GMN i CTB a saka un konseho pa por lo pronto no hasi uso di e playanan menshoná te un próksimo aviso.
Minister Pisas enkargá ku Agrikultura, Medio Ambiente i Naturalesa huntu ku kolaboradónan di Ministerio di GMN djasabra a hasi un rekorido na diferente playa na Banda Bou. Pa Minister Pisas tabata hopi lamentabel pa mira playanan ku resientemente a keda drechá, parsialmente destruí. Ministerio di GMN ku tin maneho di playanan públiko ta rekomendá pa por lo pronto no hasi uso di algun playa na Banda Bou. Minister Pisas lo hasi tur loke ta na su alkanse pa drecha e playanan mas rápido posibel pa pueblo di Kòrsou i turista ku ta di bishita.
Minister Pisas a tuma nota di e kaminda na Sta. Martha ku ta kondusí pa ántes Coral Cliff. Aki por a mira e destrukshon ku áwaseru a okashoná riba e kaminda kual por sierto Ministerio di VVRP ya tabata drechando pa hasi e kaminda aksesibel atrobe. Despues a bishitá playa di Sta. Cruz ku a keda parsialmente destruí pa gran kantidat di awa prosedente di dam Kabayé ku a pasa via e laguna bai laman. Aki por mira ku un parti di e kaminda di asfalt tambe a keda destruí. Despues a sigui pa playa Lagun kaminda tambe por a tuma nota di e destrukshon ku awa ku ta bai laman a okashoná. Finalmente a bai playa Kenepa Grandi kaminda por a nota destrukshon similar na e otro playanan di gran kantidat di awa ku a pasa bai laman.
Ministerio di GMN a notifiká CTB ku ta konsehá pa por lo pronto no hasi uso di e playanan menshoná te un próksimo aviso.
Ku hasi uso di e playanan, ta hasi esaki riba propio riesgo. Apesar ku resientemente a drecha e playanan, Minister Pisas lo hasi tur loke ta na su alkanse pa pone e playanan aki na òrdu bèk. Playa Kenepa Grandi, ku resientemente a gana premio internashonal, semper ta den spòt di wèpsaitnan i revistanan internashonal di turismo i relashoná ku esaki mester hasi lo máksimo pa drecha esaki bèk.
…Minister Pisas i kolaboradónan di GMN a inventarisá daño na nos playanan despues di áwaseru eksesivo di djasabra. Riba e kombinashon di fotonan por haña un impreshon di e destrukshon formal ku áwaseru a kousa…
