WILLEMSTAD.- Shaheen Elhage Jr. presidente di e asosashon di botikarionan VAE ta pidi atenshon di pueblo pa e kambionan den e sektor di salubridat, pa ta spesífiko proposishonnan pa tin mas remedi Over the Counter, esta remedi ku si e hende no tin sèn e no por haña.
Sr. Elhage ta kere ku mester pone atenshon na e desaroyonan rondó di e pakete pa aseguradonan ku ta kai bou di SVB esaki pa evitá diskushonnan innesesario na e balinan di botikanan dor di e oumento di gastu pa e siudadano ku ta bin for di gobièrnu. I p’esei e asosashon di botikarionan ta pone atenshon riba e preokupashon aki ku nan ta yama un humiashon pa e salú di pueblo.
Segun sr. Elhage den deklarashon na EXTRA, si tin aktuashonnan ku ta hasi difísil e parti di e servisio di botikanan, kaminda e aseguradonan no ta haña informashon, anto nan komo botikarionan mester pone pueblo na altura di kiko ta bai sosodé. Esaki pasobra kada bes ta nan komo botikario i tin di duna splikashon i haña zundrá riba desishonnan ku a keda tuma sin ni envolví ni sin konsultá ku nan. Ehekushon di e derechinan i desishonnan ku ta toka e asegurado, kaminda e botikarionan ta un dunadó di servisio den e asuntu i no ta un ‘belanghebbende’ ku ta influensiá e derechi di esun sigurá su derechi.
“I p’esei nos ta duna e informashon awor i teniendo na kuenta ku ta kòrta den e asegurado riba su remedinan i ku ta na bali, e botikarionan asistente tin di tende e vlukmentu, nan ta duna e informashon awor”. Riba e punto di ken mester duna informashon sr. Elhage a bisa ku gobièrnu ta traha e maneho i esun ku ta ehekut’é tin di duna e informashon na pueblo.
El a sigui indikando ku nan no por bisa ku nan ta di akuerdo òf no ku e desishon pa kòrta den e remedinan pasobra nan no tabata partísipe den e toma di desishon. Loke sr. Elhage por bisa ta ku e karta di e kambionan ku e tin su dilanti, e ta kontra di dje.
Sr. Elhage a bisa ku tempu nan tabata haña un porsentahe di e preis di remedi, a kambi’e pa areglo di resèpt i awor asta esei ta bisa ku ta for di proporshon. Awor por ehèmpel un remedi di kisas un florin ta e pashènt mes mester pag’é, siendo ku na Ulanda si tin e maneho ku esun ku ta kai den un sierto grupo di entrada ta haña supsidio pa su remedi. “Ta kiko nos ta besig kuné”, sr. Elhage ta puntra.
“Nunka a papia ku botikarionan i te na ora papia ku nan ta ora a tuma desishon kaba. E doló no ta botikario so, pero a pasa lei obligá tur hende pa ta sigurá serka bo i hinka tur tipo di persona den dje legal òf no. Kon nan ta kontribuí òf no i kuantu nan ta konsumí di e remedi? I awor tin e situashon ku bo no por karga. I pa kolmo a bin covid aserka. Den e periodo ei a paga pa ilegal òf no i asta esnan ku a pèrdè trabou i awor bo ta hòl e pakete uit i ta hinka e grupo di rísiko den mas rísiko ainda, pasobra ni e paracetamol nan no por kumpra mas”, sr. Elhage a bisa basta disgustá ku e desishonnan.
E hende su salú ta bai atras, nan kalidat di bida ta bai atras i aki algun tempu lo no tin remedi mes riba merkado. Un djis lo tin oumento den e kantidat di hende ku ta malu pasobra e grupo di rísiko ta bira aun mas grandi.
El a bisa bon kla ku nan no ta influensia salubridat. I si mayan bisa ku no por skibi rèspèt mas, anto nan komo botikario lo ta sin trabou. E desishonnan ku ta tuma no ta pa subi salú di hende pero pa spar i hibando kuido atras. Esaki sr. Elhage ta konsiderá komo un humiashon di salu for di e punto di bista di akountent i ekonómiko.
