WILLEMSTAD.-E koperativa di spar i krédito ACU ta hasi repartishon di surplus, e loke den pasado tabata yama dividendo. E porsentahe ta di 0.4% basa riba e surplus di aña 2022. For di ayera 12 di mart a pasa e suma ku ta toka kada sosio direktamente riba nan kuenta koriente na ACU, asina e instituto ta informa.
Ta asina ku sosionan tabata pendiente di e pago aki pa basta tempu, pero manera ta konosí pa algun aña esei no a sosodé apesar ku ACU ta un instituto sólido finansieramente. ACU ta splika ku durante reunion general di sosionan ku a tuma lugá dia 25 di yüni 2023 sosionan a vota pa sea pago di 0.4% òf 1.7% di e surplus. E 1.7% tabata basa riba e surplus di aña 2022 i tambe un averahe di añanan 2020 i 2021. Konsiderando ku e surplus di 2020 i 2021 a bai den reserva general di ACU ta nifiká ku mester hasi petishon na Banko Sentral pa por dispone di e suma rekerí for di fondonan di ACU.
Gerensia di ACU ta bai kuminsá e proseso pa logra ‘kapitaal uitkering’ pero tene kuenta ku e ta na aprobashon di Banko Sentral, pues un proseso ku ta tuma tempu. Konforme statutonan ACU ta paga surplus na sosionan ku a partisipá den e kapital na 2022 ku ta aktivo komo sosio riba 12 mart 2024.
