ADC muchu mas ku un sentro di prek; 100 aña ADC

2496


ADC ta selebrá e luna aki 100 aña. I un dushi momentu teniendo na kuenta ku tambe nan a logra 100%  akreditashon. Promé ku Djasabra a logra pasa den tur e departamentonan di ADC, Liane Virginia Cova direktor interino di ADC NV a konta algu di kiko e trabou/funshon di ADC ta den nos komunidat. ADC ta
Analytisch Diagnostisch Centrum NV

 

ADC tabata konosí semper komo e sentro pa bai prek. Tur hende ta bai einan pa hasi e tèstnan ku dòkter ta rekerí. Liane a splika ku ADC tin muchu mas servisio ku ta brinda komunidat  ku solamente prek sanger. Den último añanan ADC a bin ta krese i desaroyá enormemente i esaki en partikular debí ku nan a sigui kana ku e desaroyonan internashonal. ADC tin aktualmente 6 departamento analítiko;

Prek sanger….  

Tin e departamento di prek sanger kaminda einan mes ta hasi tur e análisisnan di sanger i ku ta sali den un dia bai bèk serka dòkternan.

Mikrobiologia….

Tin e departamento mikrobiologia ku ta investigá tambe fasetanan di sanger, sushi i urina ku ta dura un tiki mas largu pa yega bèk serka e dòkter, esaki debí ku e analistanan einan tin di hasi e trabou ku nan wowo i ku métodonan spesial ku nan mes ta traha einan.

Toksikologia…

Tin e departamento di toksikologia kaminda nan ta hasi un parti pa hustisia, kontrolá droga, remedi i por kontrolá tur loke ta líkido i ku hende ke sa kiko tin den dje, ADC ta hasi.


Patologia…. 

Tin e departamento di patologia, einan ta hasi e análisisnan pa yuda ku diagnóstiko di kanser kaminda tambe tin e departamento di diagnóstiko molekular ku ta unu relativamente nobo (DNA). Esaki ta un desaroyo mundial ku ta kresiendo kaminda ta bai haña ku hopi tèst di laboratorio lo bai wòrdu hasí usando e método ei. Riba e método nobo aki Liane a splika ku ta trata aki di algu un poko mas karu pero ta duna un resultado muchu mas lihé. Den un dia òf ménos ta saka e resultado i ta pone ku dòkternan na nan turno por atendé nan pashèntnan mas lihé ku tratamentunan.

Trombose….   

Mas aleu ADC tin e ‘Trombose Dienst’ kaminda nan ta kontrolá e pashènt segun un skema a base di kalènder pa sa presis ki dia e pashènt tin di saka sanger i ta bai serka e pashènt en kuestion i tambe ta yuda e pashènt si tin di hisa e dosis di remedi. Esaki ta sosodé den kolaborashon estrecho ku dòkternan.

Awa…..

I tambe ADC tin e departamento di awa ku por sierto tambe ta akreditá. Un i tur ku ke analisá nan awa por hasié na ADC. Den e departamento aki ta analisá entre otro e awa di Aqualectra tur dia pa asina garantisá pueblo di Kòrsou un bon kalidat di awa.

Think out òf the box….

I eseinan ta parti di e trabou di ADC ounke segun e direktor interino, nan tei pa e hende ku ke “think out òf the box” i por bai serka nan pa mira si kos ku ADC por hasi. I banda di esaki ADC ta yuda muchanan di skol ku proyektonan ku nan tin pa kaba skol sekundario. Meskos ku studiantenan ku ta bin di Ulanda ku tambe nan ta yuda pa nan por terminá nan estudio.

 

Kòntròl di kuminda….

 

ADC ta hopi amplio i banda di esaki tin mas kos den tapara. Liane a splika ku loke ta masha na moda aktualmente ta kontròl riba kuminda i esaki tambe ADC ta hasi. Mundialmente asta kuminda ta hasi den e departamento di DNA. Tin hopi desaroyo pafó di Kòrsou i ounke Kòrsou ta chikí tin hopi kos bon aki. Mester usa e konosementu di nos profeshonalnan lokal pa nos bai dilanti, asina Liane a splika Djasabra. Hasiendo mas uso di e departamento di DNA ta yuda e diagnóstiko i ta yuda e pashènt tambe.

 

Servisio den region…

 

Papiando di internashonalisá i modernisá, Liane a splika ku ADC ta brinda su servisionan den region tambe. I pa loke ta Kòrsou mes nan tin e sentro prinsipal di ADC na Vredenberg i nan tin otro dos laboratorio na Roodeweg i tin diferente sentro di prek serka di e pueblo i tin mas den tapara. Esaki pa nan ta mas serka di e pashènt i pa ADC kumpli tambe pa e resultado ta kla den un dia.

Den kuadro di 100 aña, Liane a bisa ku pashèntnan lo sintié den e siman ei i nan lo bai afó tambe ku algun presentashon pa yuda eduká.

Nan ta konsentrá den eduká pa asina yuda e pueblo pa prevení malesa i prevení ku ta hasi kosnan robes.

Si tin punto ku ADC por yuda, dikon no hasié, Liane a bisa. Nan mes profeshonalnan lo kompartí nan konosementu ku

pueblo.

 

Pa pueblo di Kòrsou ADC ta habri i  ku profeshonalnan hóben i ku eksperensia. ADC ta traha pa brinda servisio di kalidat haltu ku resultadonan konfiabel. I si tin algu ku pueblo ta pensa ku ADC no ta kumpli kuné, ta bin pa laga nan sa! Liane a bisa.

 

Akreditashon ta importante…

Carla Hous-Rafaël ta hefe di e departamento di kalidat; Akreditashon ta algu masha importante. Pa logra akreditashon, ADC tin di kumpli ku sentenáres di punto pa e ISO/IEC17025 di awa i pa e NEN-EN-ISO 15189 pa laboratorio médiko. Sra. Hous ta resaltá ku niun instansia por gañá ‘bo ku si bo ta kumpli òf nò ku e normanan, pasobra bo mes por midi esaki a base di informashon alkaso i korekto disponibel internashonalmente. Una bes ku bo a risibí un akreditashon, ‘RaadvoorAcreditatie’ di Ulanda ta ouditoriá bo anualmente.

 

Pa logra e akreditashon aki ta nifiká ku tur aña ADC a mantené su nivel di tal forma ku e ta un laboratorio konfiabel i riba nivel mundial.

I tur esaki a bira posibel danki na e esfuerso di henter e tim di ADC, lo no a logra e nivel aki. Pero nan ta traha tur dia, pa mantené e kalidat ku ta internashonalmente rekonosé.

 

Asistí otro….

Ku su ekspertisio di kontròl di kalidat i su akreditashon, ADC ta asistí diferente otro instansia manera laboratorionan na otro islanan pero na Kòrsou mes tambe riba e parti di kalidat. Por menshoná e kontròlnan riba fecha di vensementu resientemente kaminda ADC a asistí. I asina por menshoná tambe tur hospital na Kòrsou, pero tambe tur otro instansia ku ta bati na porta di ADC. ADC tambe ta yuda otro kompanianan ku ke logra nan akreditashon.

 

RvA lo tei atrobe…. 

 

Na mart di 2018 RvA lo tei atrobe, den e proseso kontinuo pa verifiká ku e instansia ku nan a akreditá, ta sigui kumpli ku tur rekisito.

Carla a splika ku ADC ta kompetí na nivel mundial i ku si un turista bishitá Kòrsou, e por ta trankil ku na ADC e por hasi kualke análisis ku e mester inkluso riba tereno di Trombosis ku e garantia ku su resultado ta di e kalidat di mas haltu i ku por interpret’é meskos ku ta interpretá e resultadonan di laboratorionan akreditá na su pais di orígen.

 

Fiesta……

Riba 12 di yanüari próksimo, ADC ta selebrá su eksistensia di 100 aña i e logro di akreditashon ku un fiesta na su lokalidat prinsipal na Vredenberg.

Djasabra a haña un rekorido den tur e departamentonan di ADC. Nos por a sera konosí di e proseso di investigashon di sanger. Ku mashinnan outomátiko/robótiko, kontròl mas profundo di sanger pa detektá entre otro bakteria i ‘schimmel’. Interesante tabata e departamento di awa. Riba e video ku nos ta presentá huntu ku e artíkulo aki por haña un bista mas aleu di kada un su trabou.

LAGA UN KOMENTARIO

Please enter your comment!
Please enter your name here