Elvin Gerard:

 

WILLEMSTAD.- 6 luna a pasa sin ku a tende mas di e proyekto di ret nobo di awa i koriente na Klein Sta. Marta i Soto. Parlamentario pa PNP, Elvin Gerard ke sa dikon e proyekto ta pará ketu pasobra e intenshon tabata ku pa yanüari e promé kasnan lo a haña konekshon di awa i koriente, pero te ainda esaki no ta e kaso.

Na sèptèmber 2023 fundashon Riba Bo Mes Forsa a lansa un gritu pa yudansa pasobra tin 16 kas ku pa 2 siman tabata sin awa i koriente. Ta trata di kasnan na Klein Sta Martha kaminda tabatin hòrtamentu di awa i koriente i konsekuentemente Aqualectra a kita tur e konekshonnan ilegal di awa i koriente.

Den e kasnan aki tin un kantidat di mas di 80 mucha ta biba. Presidente di fundashon Riba Bo mes Forsa, Yvette Melfor a mustra ku e muchanan tin ku bai skol, pero si na kas no tin konekshon di awa i koriente esaki ta bira práktikamente imposibel.

Despues di e gritu pa yudansa aki gerensia di Aqualectra huntu ku parlamentario Gerard a bai Klein Sta Martha pa tira un bista riba e situashon i papia ku e abitantenan. Eks direktor di Aqualectra, Darick Jonis a bisa ku ta bai traha na un solushon struktural pa e área.

Gerard ta bisa ku ministerio di Desaroyo Sosial, Labor i Bienestar a pone 2 mion florin posibel pa asina finansiá e proyekto pa pone un infrastruktura di retnan di awa i koriente pa e bario. Entre otro Jonis ta pensa den uso di Pagatinu i otro teknologianan moderno ku e kompania tin.

A sigui reunionnan ku abitantenan di Sta. Martha i besindario pa duna informashon riba e proyekto di ret nobo di awa i koriente na Klein Sta. Martha i Soto. A duna informashon riba entre otro ki impakto e ret nobo por tin riba abitantenan manera impakto finansiero, konekshon i deskonekshon di awa i koriente.

Segun Gerard a kuminsá aña pasá tambe ku e trabounan i un kontratista a koba na diferente aria pasobra mester a pasa e retnan di awa i koriente. “Pero mi a komprondé despues ku e trabounan a para i ku mester a buska otro kontratista”, Gerard ta bisa.

Ta den e kuadro aki e ke haña informashon di minister di Desaroyo Ekonómiko, Ruisandro Cijntje ku ta responsabel pa Aqualectra. Gerard: “Tin 6 luna kaba ku nada ta pasando. Tin kaminda ku a koba ku ta habrí ainda.”

Tambe Gerard ta bisa ku mester a traha pa asina sentralisá konekshonnan di koriente, pero esaki tampoko a tuma lugá ainda. Pa e motibunan aki Gerard ke sa di minister Cijntje ta kiko ta e problema ku e proyekto ta kore asina tantu retraso.

“Ta kiko ta e problema? Ta sèn òf ta material no tin”, Gerard ta puntra.

LAGA UN KOMENTARIO

Please enter your comment!
Please enter your name here