WILLEMSTAD.- Por spera di un bon doño di trabou ku e ta anda ku koutela ku interes di su trahadónan. E prohibishon di entrada ku minister Javier Silvania a duna hefe di Technische Higiënishe Zaken (THZ), Gisette Seferina a dura sinembargo asina largu ku esaki tabata un kastigu desproporshonal kontra su persona.
E tipo di medida aki por dura 6 siman te máksimo 3 luna. E minister a duna Seferina un prohibishon sinembargo for di 14 aprel 2023, pues 12 luna pasá pa e keda pendiente di un investigashon ku mester a tuma lugá ku e koutela i liheresa nesesario.
No por keda persistí den prolongá un medida di karakter temporal manera prohibishon di entrada bou di e preteksto ku esaki ta na interes di e investigashon. Gobièrnu mester a skucha e ámtenar riba e puntonan ku ta akus’é di dje, pero a dura te 16 febrüari 2024 promé ku esaki a tuma lugá.
Esaki ta 10 luna despues ku a dun’é su promé órden di prohibishon pa drenta ofisinanan di gobièrnu. Mientrastantu manera a bira kustumber a laga e kompania Forensic traha un rapòrt riba e ámtenar sin ku a dun’é posibilidat pues pa reakshoná riba esaki i ku finalmente tambe e konseho final di departamento Human Resources & Organisatie (HRO) a desbaratá.
E investigashon aki mester ta sufisientemente supstansiá i e ámtenar konserní mester a haña sufisiente kontribushon den e investigashon. Si e minister lo a persistí den keda prolongá e prohibishon di entrada i e ámtenar bai korte ku gobièrnu e chèns ta grandi ku e ta gana e kaso aki.
Tur ta puntonan pues ku Silvania no a kumpli kuné pa kua motibu departamento di HRO a indiká den nan konseho ku Seferina mester bai bèk den su funshon. Un prohibishon di entrada por tin konsekuensianan serio pa e ámtenar den kestion ku ta mishi den su posishon hurídiko i si e bai korte ku gobièrnu ku tur probabilidat e lo gana e kaso tambe.
Relashoná ku otro akusashonnan kontra Seferina, esta ku e tin un relashon ku un trahadó ku ta kai bou di dje tambe i ku el a ekspresá su mes di forma negativo tokante e trahadónan tambe ta yega na e konklushon ku por duna un atvertensia pa esaki, pero ku no ta algu pa a tuma un medida asina desproporshonal kontra su persona. Un relashon amoroso ta algu primeramente di bida privá ku e hefe di THZ.
Den kaso ku tin un situashon ku e doño di trabou no ta haña deseabel, pasobra dos trahadó tin un relashon ku otro, por traha palabrashonnan di trabou riba esaki. Echo ta ku pa e periodo kòrtiku ku Seferina a funshoná komo hefe, esta promé ku a dun’é prohibishon di entrada, el a demostrá di ta disponé di e konosementu, e ta un eksperto i tin e eksperensia pa funshoná komo hefe di THZ.
