WILLEMSTAD.-Antillean Soap Company (ANSO) a risibí vehíkulonan nobo pa mehorá servisio pa kliente i entrega di produkto. E vehíkulonan ta resaltá pa nan aparensia kolorido, ku potrètnan di e produktonan di e fabrika di habón lokal situá na Brievengat.
Na aña 2021 MetaCorp a kumpra Antillean Soap Company. Ku su tim di gerensia nobo e kambionan a kuminsá bira riparabel: Tin un sistema di produkshon mas efisiente, mas surtido i mas benta di produktonan lokal di habón, detergente i otro produktonan di limpiesa. E empleadonan tabata e proménan ku a sinti e diferensia ku mehoransa di prosesonan i kambionan na e planta di produkshon. Anthony Hollander, General Manager di e kompania ta bisa; ‘Esaki ta lokual ku ta hasi nos grandi: Produktonan “best-in-class” mará na e mihó servisio pa klientenan”.
Antillean Soap Company un kompania lokal brindando produktonan di bon kalidat pa 45 aña kaba. Banda di su base fuerte na Kòrsou, ANSO orguyosamente ta eksportá su produktonan pa 17 pais, kontribuyendo na ekonomia lokal ku empleo i ingreso di divisa.
Na Kòrsou e kompania MetaCorp, doño di ANSO, ta konosí pa su desaroyo di e área di Rif Fort i Renaissance Hotel. Riba e foto gerente general Anthony Hollander i gerente di merkadeo Arnaud Scheper ta risibi yabinan di e vehikulonan nobo for di Marcelino de Lannoy CEO di MetaCorp Curaçao.
