YEREVAN, ARMENIA, AFP.- Polis di Armenia a detené mas di 200 manifestante anti gobièrnu, segun preshon ta sigui oumentá riba promé minister Nikol Pashinyan relashoná ku e forma kon el a atendé e disputa teritorial ku Azerbeidjan.
E manifestashonnan a kuminsá djadumingu na Yerevan, ku oposishon eksigiendo renunsia di Pashinyan, akusando e di a sera kòmplòt pa entrega tur region di Nagorno-Karabakh na Baku, kual e dos paisnan a bai guera pe den 2020.
Polis a reprimí manifestantenan kua blòkia tráfiko den sentro di Yerevan durante demostrashonnan ku a tuma lugá entre djaluna i djamars mainta, provokando esenanan kaótiko i protestanan grandi den e pais desde elekshonnan di sèptèmber último.
E ministerio di interior a bisa ku “a detené 237 manifestante” na Yerevan i vários siudat provinsial.
E protestanan ta mustra e amargura ku ta reina pa liderazgo di Pashinyan desde guera di seis siman den 2020 kual a kobra mas di 6500 bida promé ku a terminá ku un akuerdo di tregua negoshá pa Rusia.
Armenia i Azerbeidjan ta den un disputa pa vários dékada kaba pa Karabaj, e region habitá pa armenionan di Azerbeidjan.
