David Paulus
Artista/diseñadó
Na 2003 David Paulus huntu ku su famia a emigrá pa Ulanda, kaminda el a sigui ku su skol i awe e ta un artista diseñadó, terminando su estudio pa dosente di arte. Resientemente e tabata den un eksposishon den Museo di Arnhem kaminda el a bria un biaha mas ku e historia di su isla, Kòrsou. El a habri su mes ku Djasabra pa konta su historia ku entusiasmo.
Sera konosí ku David Paulus
David Paulus a konta Djasabra ku el a nase na Kòrsou i na 2003 el a bai Ulanda pa biba. Promé e no kier a bai Ulanda pero su wela a sera sèn i manda mama ku su yunan Ulanda. Despues David a komprondé dikon e wela a insistí pa nan bai Ulanda pasobra David su kreatividat na Kòrsou e no por a ekspresá su mes bon i na Ulanda tabata algu otro. Na Kòrsou David a bai Kolegio Pierre Lauffer, despues Maris Stela un aña i di einan a bai Ulanda. Na Ulanda David a studia diferente kos. Den promé fase el a eksplorá su mes pa sa kiko e ta gusta. Asina el a hasi atministrashon, kuido ku si el a kaba. Despues baile i drama pero no ta loke David tabata ke. Despues el a muda pa Steenwijk ku ta keda den bisindario di Groningen i einan a studia pa Detail Handel. Einan e mode a kuminsá lanta den dje. E tabata traha den pakus i a tende ku paña i einan e moda a drenta David. I el a sigui den e área di moda i arte. Tabata algu inkonsiente pero ta remarkabel ku den e e periodo ei na Steenwijk e tabata deskubrí su mes, e tabata depresivo i no tabata bai skol. Un amigu a rabia kuné ku e ta den kas i den kas i su amigu tabatin un mashin di kose masha bieu mes i a trese pe i bis’é bai hasi algu. Komo el a haña e mashin di kose i David a bai eksplorá i a kose un T-shirt. Ora el a kaba e mes a keda asombrá di kiko el a produsí. Ku e mashin bieu di mas di 80 aña ei e kosnan a kuminsá kana mes. I asina a bin resaltá ku e kos aki semper tabata den dje. Na Kòrsou e tabata bisti su primanan sakudí plèstik i modelá den kura. I asina universo ta traha segun David, si algu ta pa bo finalmente e ta bin pa bo tambe. Si algu ta den bo, universo ta yuda bu yega na dje.
Pòpchi bala bala
Algun siman pasá e tabata den un eksposishon na Arnhem kaminda el a pone atenshon na e forma kon nos tabata peña e mucha muhénan. David a bisa ku tempu e tabata chikí, e tabata gusta mira su mayornan i wela peña su primanan flèktu tur dòrna na streki i bala di koló. Ora Arnhem a bis’é di e eksposishon i pa e tuma parti na dje el a pensa kiko e ta bai kuné pa un biaha mas Kòrsou bin dilanti. Asina el a bin ku e tema di paña i arte inspirá di e tema Pòpchi Bala Bala.
Diferente eksposishon
David a yega di partisipá na diferente eksposishon den pasado. Aña pasá e tabata na Arnhem tambe kaminda el a enfatisá riba e paña kultural di Kòrsou di saya ku djèki i e tabatin un stelazji ku e tema Kas di Kunuku. El a pinta un kas di Kunuku di kasi 6 meter haltu i a pone hende muhé i hende hòmber ku pañanan tradishonal di Kòrsou bistí. Tabata algu di arte kaminda el a pinta nos héroe Tula i a dun’é honor riba un di e sayanan. Tambe el a pinta Mama Elia, Joyceline Clemencia i Dinah Veeris pinta riba e pañanan. I asina semper el a pone atenshon riba Kòrsou semper den su arte ora e presentá su eksposishonnan.
No den tienda
Segun David, e tin diseño ku hende por kumpra pero e no tin un negoshi kaminda por yega i kumpra su obranan. Pa David si e tin di traha paña pa pone den negoshi pa hende kumpra, no ta loke e ta haña leuk mas. E ta traha algu i esun ku ke kumpra ta kumpra. E no ta pone preshon riba produsí kolekshon. Su moda ta arte ku no ta haña bida.
Dosente di arte
Esaki ta David su trabou. El a bisa Djasabra ku e ta haña proyektonan pa e traha obranan. Por ehèmpel di e eksposishon na Arnhem e ta haña un suma di plaka ku e ta usa un parti di dje pa e materialnan ku e mester i sobrá pa kubri su mes gastunan. E ta duna lès den zumba entre otro na hende grandi di kual tambe e ta gana su pan. Aktualmente e ta den su último aña komo bachelor pa dosente di arte i ‘vormgeving’ na Tilburg.
Inspirá hóben
David ta spera ku un dia e lo presentá su obranan na Kòrsou. Esei ta loke a pasa den su kabes kaba pero e mester di un lugá apropiá. E tin hopi kos di arte ku no ta paña so pero e tin kuadro, potrèt i hopi kos mas ku el a traha den 3 aña. Un eksposishon lo ta bon pa inspirá hóbennan loke ta su meta den bida. E ke inspirá hóbennan ku nos tur ta kreativo i si bo bai pe bo ta logra. Pa David arte ta yuda kura. E tin e poder kurativo i tur hende mester tin arte sea pa gana sèn òf no pero hasi arte. E ta yuda hopi.
Mi futuro
E loke David ke logra den futuro ta inspirá otronan i awor aki e ta besig terminando su estudio i nan mester traha un produkto di arte edukativo ku ta un lès pakete. I e lès aki e ta dediká na Kòrsou. E ta pensando un manera di trese téknikonan na Ulanda den un forma di buki òf algu ku e dosentenan na skol por haña pa nan us’é pa traha arte pa muchanan. Mester tin trahamentu di mas arte na Kòrsou. Esei ta desafiante pa muchanan i asina e ke kontribuí na enseñansa na Kòrsou.
Arte no semper ta kosta sèn
Mas aleu el a bisa di ta kere ku arte mester haña mas balor. Arte ta hopi importante pa pone énfasis riba dje. Arte ta yuda kura. I si bo tin strès, preokupashon, arte ta yuda. I arte no semper mester kosta sèn. Di loke haña den mondi i riba kaya por usa i asina aport’é na arte si no tin sèn.
