WILLEMSTAD.-Vários parti di Kòrsou a haña un palu di awa awe mainta. EXTRA ta indiká ku ta vários parti pasobra tin área ku no a haña hopi awa. Banda Bou ta e área ku sigur a risibi mas tantu awa. Playanan n Banda Bou lo no ta aksesibel awe i meskos vários kayanan prinsipal na Banda Bou.
Reporteronan di EXTRA ta kubri e situashon di awa i banda di esei tin otro siudadanonan ku tambe ta kontribuí ku mas foto di situashonnan ku nan ta topa.
Den área di Westpunt por a mira e gran kantidat di awa ta laba bai laman, miéntras ku palunan grandi a kai riba kaminda. Brantwer i otro servisionan di emergensia ta siguiendo e situashon di aserka i manera EXTRA a informa kaba premier Pisas a reuní kaba ku tim di kalamidat pa asina ta prepar’é pa kualke eventualidat. Kòrsou tabata pasando un periodo largu di hopi sekura i áwaseru ta un gran bendishon, sinembargo e ta kousa problema den sierto área debí na e kantidat.
Mester bisa ku Servisio Meteorológiko a saka su atvertensia for di 3’or di mardugá i despues a sigui manda mas informashon den kareda di 6’or di mainta. Keda pendiente asina tin mas informashon EXTRA lo trese esaki.