Aldaïr Pieters ke pa duna sentronan di bario bida bèk
E wikènt aki a estrená e obra Bibi Snek. E obra ta un inisiativa di Aldaïr Pieters huntu ku su elenko Norma Cova, Sara van Nes, Milushka Birge, Gian van Eiker, Kees Scholten i Albert Schoobaar, Teksto: Milushka Birge, Konsepto i Direkshon: Kees Scholten, Musika: Eric Calmes, Konkie Helmeyer i Aldaïr Pieters i Kompañá pa hóben aktornan di Kas di Teater di Teatro Bulabanda. Teatro Bulabanda huntu ku Volksoperahuis di Amsterdam ta presentá: Bibi Snèk, komedia musikal tokante e último snèk krioyo den Otrobanda. E hóben rèper Aldaïr Pieters a bini ku e idea di un obra teatral den su bario Otrobanda.
Obra musikal teatral
Nos a papia ku Aldaïr Pieters ku a konta e konsepto tras di Bibi Snek. Ta trata di un obra musikal teatral. Aldaïr ta na Kòrsou pa algun dia pa presentashon di Bibi Snek. El a bisa ku ta trata di algu ku e ta hasiendo hopi tempu kaba. Bibi Snek ta un historia di su famia. Su opa defuntu tabatin un snèk i e tabata keda manehá pa un ruman ku tabata yama Bibi. Esei ta e historia ku Aldaïr a lanta tende for di chikí. Su mayornan a kont’é e historia ei i el a haña great ku su hendenan tabatin nan mes negoshi, pero ku no tei mas. Bibi Snek tin un durashon di 1 ora. Trahando ku Volksoperahuis el a yega na e idea pa bai hasié un obra. I ta den e kuadro aki Aldaïr ta na Kòrsou aktualmente pa e dos wikèntnan di presentashon di e obra Bibi Snek.
E idea di un snèk
El a sigui konta nos ku loke a atraé pa traha un obra tabata e idea di un snèk kaminda hopi hende ta bin huntu ta loke a fasin’é. Hopi kos ta pasa den snèk. Hopi informashon interkambiá den snèk. Kaminda tin hende tin bida i asina bo por traha teater tambe. Lo eksperensiá hopi konflikto, drama, harimentu, músika bibu dor di diferente aktor entre otro Aldaïr mes. Lo bin hopi pregunta na públiko mes kiko nan lo hasi den situashonnan ku lo presentá den e obra. E forma di teater aki ta ku públiko no ta sinta wak e obra pero nan ta den e obra, nan ta den Bibi Snek i e públiko lo partisipá sin ku nan mes lo sa. I ora papia di snèk hopi bia ta pensa riba hende fuma, muhé pero den e kaso di e obra e ta mas bien un enkuentro di hende kaminda tin hopi papiamentu, interkambio di informashon, hungamentu di dominó, union. Loke e ta saka afó mas bien ta e union segun Aldaïr.
Un seri di Bibi Snek
E obra ta tuma lugá den sentro di bario Otrobanda. E espasio no ta asina grandi pa míles di hende pero esei no ta e intenshon tampoko. Lo bai akapará máksimo 70 hende pa wak Bibi Snek. Riba e plenchi di sentro di bario Otrobanda ta kaminda e obra lo tuma lugá. E estreno tabata dia 8 i e lo ta djasabra 9 i djadumingu 10 i tambe otro wikènt. No tin mas funshon pero seis so. Otro aña lo bin e di dos seri. Bibi Snek lo bira un seri. E aña aki ta un episodio piloto i dependé kon e bai i e planiamentu e lo sigui den su serinan.
Sentro di bario a forma generashonnan
Aldaïr mes a kuminsá ku skibimentu di muzik. El a krese ku muzik entre otro esun mas konosí ta Liberá ku Izaline Calister. For di mucha el a kuminsá chikí, e ta kòrda di a partisipá den un obra bou di Albert Schoobaar. E tempu ei e tabata studiante i awe e ta kolega ku Albert den e produkshon aki. Tambe el a hasi diferente pelíkula i a haña oportunidat pa sigui skol na Hulanda na 2015. Asina el a muda pa Hulanda. Awor e ta aktor profeshonal, bibá na Hulanda pero ta konstantemente na Kòrsou. Aldaïr ta kere ku awor aki Kòrsou ta den un fase ku nos mes tin di krea oportunidat pa nos mes i esei el a hasi ku Bibi Snek. El a pens’é i bin kuné pa e biba for di e proyekto aki den e temporada aki. Esaki ta su promé obra ku e ta produsí, tantu na Kòrsou komo na Hulanda. I el a skohe sentro di bario Otrobanda pasobra sentro di bario ta su kas, einan el a siña promé deporte i e kier a bin bèk ku su trabou na su kas kaminda e ta sintié mas konfortabel. El a molestiá dia el a tuma nota ku sentro di bario Otrobanda tin debe na FKP i ke saka nan afó i p’esei si e por kontribuí pa stimulá tráfiko di proyekto, e lo hasi sigur. E ta tras di sentronan di bario kompleto pasobra sentro di bario a forma generashonnan pa hopi aña. E lo para semper tras di sentro di bario.
Tin trabou den arte
I pa esnan ku ke bai studia arte Aldaïr ta kere ku ta masha dushi pa bisa sigui bo soño pero mas importante ta nos mester kere ku tin trabou den e área ei i e parti artístiko kultural ta bal meskos ku kualke otro trabou regular, ku segun otronan ta esnan mas sigur.
Por haña karchi na Mensing Caminada, Van den Tweel, Tu y Yo i Ticketpoint i www.caribbeantickethop.com
Bibi Snek a bira posibel ku sosten di Fonds Podiumkunsten i Prins Bernhard Cultuurfonds Caribbean.
