Den fase i bon kontrolá
WILLEMSTAD.-Un informe di Banko Sentral di Kòrsou i Sint Maarten (CBCS) ku a drenta fresku awor aki ta mustra riba desaroyonan nobo pa loke ta trata e kompania ENNIA Caribe Leven NV (ECL). E informe ta indiká ku despues di un trayekto intensivo di konsulta pa yega na un solushon pa e problemanan na e kompania menshoná, gobièrnu di Kòrsou a disidí siman pasa pa no kontinuá ku e senario ku a papia di dje anteriormente, esta un ‘doorstart’ den kua e kompania lo a sigui pero den un forma ma chikitu. CBCS ta informa ku gobièrnu di Kòrsou a kaba di tuma e desishon ku ta opta pa stòp ku operashon di ENNIA Caribe Leven, pero na un forma kontrolá i den fase.
Banko Sentral lo kaba di deliberá ku e gobièrnu di paisnan Kòrsou i Sint Maarten den próksimo simannan kon ta duna kontenido na e seramentu di ENNIA Leven den fase i bon kontrolá. Esaki ta enserá lógikamente ku mester deliberá kon ta sigui ku e kompanianan ku si ta sano den e grupo ENNIA manera ENNIA Caribe Schade NV, ENNIA Caribe Zorg NV, ENNIA Caribe Leven Aruba NV, i ENNIA Caribe Schade Aruba NV.
Banda di esei lo pone atenshon spesial na e pólisanan di ECL ku ta basa riba pago di prima kual a keda sera despues ku e areglo di emergensia a drenta na vigor. CBCS ta enfatisá ku durante di e periodo ku ta atendé e finalisashon di ENNIA Caribe Leven lo kontinuá ku e areglo di emergensia den kua Banko Sentral ta sigui vigilá i kuida interes di kreditornan di ENNIA entre kua tur e doñonan di pólisa.
Ekspertonan di e materia ku EXTRA a konsulta ta mustra ku e echo ku gobièrnu ta hasi esfuerso pa kuida interes di tur esnan ku tin nan penshun na ENNIA ta algu positivo pasobra di otro forma e impakto lo ta grandi no solamente pa e 30.000 hendenan pero pa hinter komunidat. ENNIA Caribe Leven no ta bai sigui ta nifiká ku lo kaba di atendé penshun di esnan ku tin derecho etc pero no ta permití pa sera niun areglo nobo.
Riba e punto di tasa di interes ku ta menasa ku lo por bira mas haltu, ekspertonan respetá den e área ta splika EXTRA ku e lei di konsenso di Reino ta bisa bon kla ku den kaso ku Hulanda fia e paisnan aki plaka, ku esei ta sosodé konforme e tasa di interes ku ta vigente na e momentunan ei. e tasa di interes di 6, 7 i asta 8% ku ta sirkulando e dianan aki no ta e tasa di interes ku Hulanda lo haña fia, pues lo ta hopi inkorekto pa Hulanda bai pretendé di ke fia Kòrsou na un tasa di interes asina haltu. Ademas esei lo ta kontra di e lei di konsenso di Reino.
