A sera Topogigio/Jun Hao i Captain’s Sport Bar
WILLEMSTAD.-E tim di MEO/BAB/GMN/Polis i Duana ta hasiendo un tremendo trabou kontrolando establesimentunan ku ta bende kuminda. Djasabra 7 di oktober, esta ayera e tim a kontrolá 9 lokalidat. Mester bisa ku mayoria establesimentu ta kumpli basta bon ku e reglanan pero di otro banda tin otronan ku simplemente ta un porkeria total. E fotonan ta papia palabra kla.
Di e 9 establesimentunan 3 tabata kumpli ku reglanan, 3 a haña un atvertensia i a sera 3.
E tresnan ku mester a sera nan mesora debí ku nan kushina tabata un porkeria kompletu ta Topogigio Snack Center na Roodeweg. Tambe a sera Jun Hao Restaurant na Roodeweg. E kushina ta a-higiéniko. A sera tambe Captain’s Sports Bar & Grill na Fokkerweg, pasobra ei tambe e kushina ta a-higiéniko.
Minister Cijntje i sr. Ronny Cornelis di MEO a yega di bisa algun palabra hopi sierto. E tim di trahadónan di gobièrnu por keda hasi kontrol pero ta keda na kada hende den e pueblo aki pa disidí kiko e ta kumpra pa hinka den su kurpa. E responsabilidat ei ta di kada siudadano. Si nota ku MEO i e tim a sera lugá, wak bon promé ku bolbe bai kumpra kuminda. Mas detaye den edishon di EXTRA.
