WILLEMSTAD.- E hóben beisbolista Jadon G. (19) ta atraká miembro di su propio tim di beisbòl i maltratá esaki. Jadon ta keda akusá di 5 echo kastigabel ku ta referí na atrako i maltrato di un hòmber víktima riba dia 21 di desèmber 2022. Jadon ta keda akusá pa maltrato ku arma di kandela, di kua e lo mester a dal e víktima kuné den su frenta, hòrta 2 telefòn selular i oloshi di e víktima. El a hasi esaki usando agreshon ku arma di kandela. Huntu ku su kómplise Anthony, a obligá e hòmber víktima na drenta un kas bandoná, ranka su paña, lag’é keda blo sunú, hòrta su oloshi i tira paña di e víktima na laman. Anthony tambe lo mester a ekstorshoná e víktima dor di menas’é di lo agredié pa dun’é fl. 500. Tur esakinan a sosodé ku arma di kandela di kua e ta keda tambe akusá di tin den su poseshon. E víktima di su banda a hasi petishon di daño i perhuisio pa e materialnan ku el a pèrdè i e trouma ku el a haña debí na e echonan aki. Jadon a bisa ku no ta algu ku e kier a hasi pasó e tin un karera maravioso di beisbòl su dilanti i ku e tabata bou di preshon di amigu. Fiskal di Ministerio Públiko ta kuestioná esaki basá riba e kombersashonnan di telefòn ku a keda di tap ku ta indiká ku Jadon tabata broma ku e akto ku el a hasi.
Jadon tabata konosé e hòmber víktima. Vários persona ku ta forma parti di direktiva di e organisashon di Beisbòl ku Jadon ta pertenesé na dje, tabata den sala di korte pa sigui tratamentu di e kaso aki.
Wes a puntra Jadon kon su relashon ku e hòmber víktima ta, pasó for di dokumentashon dje kaso ta indiká ku e víktima, ku ta homoseksual a hasi Jadon un proposishon indesente. Esaki por ta e kousa ku Jadon a agredí e hòmber víktima. Jadon a splika ku riba e dia di e suseso, el a pidi e víktima un left bou di konfiansa debí ku e víktima ta forma parti di e mesun organisashon kuné. E víktima a bai para na kas di un famia di dje, i Jadon a baha kuné pa e karga su selular. Den e kas, e víktima a sera e porta di kas i lòk esaki ku Jadon aden, pa despues e tira man riba dje pa baha su karson. E víktima a proponé sèks oral, di kua Jadon a rabia masha hopi, i a dal e víktima ku un arma ku e tabatin pa su protekshon den su frenta. Jadon ta sigui bisa ku el a kita e pertenensianan di e víktima for di dje, p’asina e víktima kita e lòk di porta, i asina e por a sali bai. E momentu ei e víktima a ofresé Jadon fl.1000,- pa e no bai hasi denunsia na polis, i Jadon a aseptá e sèn. Jadon a duna e víktima tur su pertenensianan bèk ku eksepshon di e telefòn ku a kai kibra durante e suseso. E víktima a sigui bisa ta despues di e reunion seksual ku Jadon na e kas enkuestion, el a ripará ku e akusado a keda ku su selular. Na momentu ku el a bai busk’é pa e por haña su telefòn bèk, Jadon huntu ku su kómplise Anthony a hib’é un kas bandoná, oblig’é kita su paña, i tambe su oloshi.
Di akuerdo ku wes, durante investigashon a haña kombersashon di Facebook entre e víktima i Jadon kaminda e akusado ta eksigí e víktima plaka.
Fiskal di Ministerio Públiko ta haña ku e echo aki ta keda probá basá riba e kombersashonnan di telefòn di Jadon ku ta indiká ku e akusado a dal un hende ku arma i hòrta su selular. E kombersashonnan ku a keda di tap tambe ta mustra ku Jadon a ekstorshoná e víktima pa sèn, pa e por haña su yabi di outo bèk. Fiskal ta tene kuenta si ku Jadon a deklará su mes kulpabel i a demandá 6 aña di kastigu p’e, kitando e dianan ku el a sinta den aresto preventivo.
Abogado di Jadon a trese dilanti ku e organisashon di beisbòl a duna hopi bon referensia di e akusado, ku e ta un beisbolista aktivo, talentoso i respetuoso. E ta sigui bisa ku Jadon tabata den situashon pa defendé su kurpa ora ku e víktima a tira man riba dje, i hasié e proposishon indesente. Mas aleu e defensa a bisa ku e arma ku Jadon tabatin ta un ‘hagelwapen’, banda di esei tin prueba di kombersashonnan di telefòn di Jadon ku ta indiká ku e víktima a ofresé Jadon sèn pa e no papia, pues Jadon a bin bèk riba e proposishon di e víktima pa tuma sèn. Aki dos siman wes lo dikta sentensia.
