WILLEMSTAD.- Mas hóben ta haña kastigu di prisòn pa akto di ladronisia. Ta trata dje akusado Deymison B.(20) ku ta keda akusá di a tira atrako ku agreshon ku arma di kandela, riba establesimentu Electronics riba 13 di yanüari di e aña aki.
Di akuerdo ku wes, riba e dia enkuestion 4 hòmber kara tapá i armá, a drenta e establesimentu gritando “atrako”, a obligá e personal pa bai den depósito, kaminda nan a hòrta 42 selular, 6 tablet, 4 “airpod” i vários otro artíkulo elektróniko.
Den kuadro di investigashon, a sigui e telefònnan hòrta, i a yega na e akusado Deymison. Polis a interogá Deymison su frei kende a deklará ku Deymison a dun’é 2 telefòn riba e fecha di e atrako i a bis’é ku nan ta hòrtá. E frei a deklará tambe ku Deymison a trese vários artíkulo elektróniko na su kas, el a wardanan i despues bende nan. For di kombersashonnan di WhatsApp tambe polis por a komprobá ku Deymison tabata kier a bende algun telefòn i airpods ku e tabatin den su poder.
Deymison ta detené aktualmente 2 luna kaba na SDKK. Wes ta indiká ku no ta promé biaha ku Deymision ta hañ’é den problema ku hustisia. El a haña kastigu pa komplisidat di arma na Boneiru, a sinta 2 luna den prizòn.
Deymison ta bisa ku e akusashonnan aki no ta bèrdat. El a kumpra e telefònnan aki serka un tal Oliana. Fiskal di Ministerio Públiko ta haña ku e atrako por keda probá sigun hurisprudensia ku ta duna kulpabilidat basá riba e echo ku e artíkulonan ta den poder di e akusado, djis despues di e atrako. Fiskal a sigui bisa ku en todo kaso si, e benta, inkubrimentu di artíkulonan prosedente di ladronisia, tambe ta keda probá den e kaso aki.
E abogado di Deymison, mr. Montroos a bisa ku no tin prueba ku Deymison a tira e atrako, i ku no a haña niun arma di kandela na Deymison su kas durante entrada hudisial. Mr. Montroos ta hasi petishon na wes pa duna Deymison un kastigu kondishonal so.
Wes a dikta sentensia den e kaso aki mesora, kondenando Deymison un kastigu di 10 luna di kua 6 ta kondishonal pa e akusashon di inkubrimentu. Esaki, bou di e kondishonnan ku Deymison ta haña guia i ta raportá un biaha pa luna na Reclassering. Tambe e akusado tin ku sigui su estudio, i solisitá por lo ménos 4 biaha pa luna pa un trabou.
