CBCS ta organisá pa di kuater bia
WILLEMSTAD. – Centrale Bank van Curaçao en Sint Maarten (CBCS) ta anunsiá inisio dje di kuater edishon di e konkurso Best Economic Research Award (BERA) na nivel di HAVO i VWO. Ta invitá tur alumno ku ta den nan último aña di HAVO òf VWO na Kòrsou i Sint Maarten pa entregá un ‘profielwerkstuk’ di ekonomia, riba un tópiko ku tin relevansia pa e ekonomianan di e union monetario. Tantu e alumno(nan) ganadó komo e skol(nan) en kuestion lo risibí un premio atraktivo di CBCS.
Den e promé kuartal di 2024, CBCS lo lansa e konkurso BERA pa studiante na nivel di Bachelor i Master tambe. Meta di e konkurso BERA ta pa stimulá investigashon ekonómiko bou di e hóbennan na Kòrsou i Sint Maarten. Fuera di esei, di e manera akí, CBCS ta spera di inspirá e alumnonan pa sigui un estudio riba tereno di ekonomia. P’esei, kada ganadó na nivel di HAVO i VWO lo risibí un premio di NAf. 2,500 i un trofeo, miéntras ku e skol ganadó den kada kategoria lo risibí un premio di NAf. 5.000 i un trofeo.
‘Atraves di e último tres añanan, CBCS a opservá un oumento den e kantidat di alumno i skol ku ta partisipá, tambe a nota mehorashon supstansial den kalidat di e obranan presentá. Aña pasá, tantu e alumnonan komo e dosentenan a mustra hopi entusiasmo pa e konkurso i esei ta presis loke Banko Sentral ke mira’, asina Direktor Ehekutivo di CBCS, Dr. José Jardim a duna di konosé.
