TEHRAN, IRAN, AP.- Boeing Co. A firma un kontrakt di 3.000 mion dòler pa bende Iran 30 avion komersial. Esaki ta e promé interkambio komersial di e magnitut aki di un kompania merikano ku unu di Repúblika Islámiko desde ku gobièrnu di Donald Trump a pone sanshon nobo.
E akuerdo pa 30 Boeing 737 MAX, ku ta inkluí e opshon pa 30 mas, por obligá Trump pa skohe entre su dos promesanan mas grandi di kampaña i esaki ta pa: adoptá un posishon mas fuerte kontra Iran òf protehá trabou den Merka.
E operashon aki ta sigui unu similar será den desèmber ku e aerolínea nashonal iraní, Iran Air, pa benta di 800 avion di pasahero na 16.000 mion dòler. E kontrakt ta forma parti históriko di e akuerdo nuklear alkansá entre Iran i potensianan internashonal durante gobièrnu di Barack Obama.
Trump a kritiká e akuerdo nuklear fuertemente, pero den febrüari el a bishitá un planta di Boeing Co., i a elogiá trabou di e empresa aki.
Boeing a firma e akuerdo ku aerolínea iraní Aseman Airlines, propiedat di e fondo di penshun di empleadonan sivil di Iran. Aseman, e terser aerolínea mas grandi di e pais ta kubri rutanan nashonal i internashonal.
E bosero di Aseman Amir Reza Mostafavi a bisa na The Associated Press ku e akuerdo a tuma lugá despues di vários ròndu di kombersashon ku Boeing den último aña el a bisa ku e dos kompanianan a firma e akuerdo riba 18 di mart i ku e avion ta wòrdu entrega den 2019. Boeing a bisa ku e promé entrega lo ta den 2022.
