CARACAS, AP.- Polis mester a plama míles di manifestante ku gas lakrimógeno, bala di rùber i awa kual a wòrdu lansa desde trùknan di brantwer.
Esnan ku tabata marcha na Caracas tabata debí na e tenshon polítiko pa e desishon di Tribunal Supremo, di asumí podernan di Kongreso i limitá inmunidat di legisladornan.
Plaza Venezuela, Punto di salida di e marcha, a wòrdu okupá desde mardugá pa sentenar di guardia nashonal i polis ku a blòkia akseso. Outoridat a instalá sinku tanki i kuater trùk di brantwer pa impedí e manifestashon, ku no tin pèrmit di outoridat.
E manifestantenan a disidí pa marcha riba kayanan den pueblo di plasa gritando “nos kier elekshon”. Pero su paso a wòrdu interumpí pa forsanan di seguridat, ku a purba plama a públiko.
Pas mas di un ora, sentenar di persona algun di nan ku kara tapa ku tela i máskara, a resistí e akshon di kuerpo di seguridat i a rospondé tirando piedra i a ranka eskudonan di protekshon. Desde algun edifisio pertenesiente na gobièrnu, kaminda famianan pober ta biba, algun a kuminsá tira bòter kontra e manifestantenan.
Durante e protesta, presidente di Asamblea Nashonal, diputado Julio Borges, a wòrdu agredí pa kuerpo di seguridat.