BRASILIA (AFP).- Presidente di Brasil, Luiz Inácio Lula, ayera a elogiá e “desishon históriko” di Spaña, Irlanda i Noruega pa rekonosé e estado palestino, un desishon ku e ta konsiderá positivo pa yuda den e esfuersonan di pas den Medio Oriente.
“E desishon konhunto ta hasi hustisia na hinter un pueblo, rekonosé pa mas di 140 pais, pa su derechi di outodeterminashon”, segun e mandatario iskierdista a skirbi riba ret sosial X.
“Ademas, e desishon aki lo tin un efekto positivo komo apoyo na esfuersonan di pas i stabilidat den e region. “Esaki solamente lo tuma lugá na momento ku garantisá e eksistensia di un estado palestino independiente”, segun el a bisa.
Lula, di 78 aña, a rekordá ademas ku Brasil ta un dje promé paisnan di Amérika Latina pa rekonosé e estado palestino. Brasil a hasi esei den desèmber di 2010, den e di dos mandato dje veterano lider brasilero.
Spaña, Irlanda i Noruega a anunsiá djárason ku dia 28 di mei nan lo rekonosé e estado palestino, loke a provoká rabia serka Israel ku ta den pleno guera kontra e movementu islamita Hamas den Gaza.
Den febrüari último, Israel a deklará Lula “persona non grata” i a konvoká e embahador brasilero den Tel Aviv, despues ku e mandatario a kompará e atakenan israelí den Gaza komo Holocaust.
