VARSOVIA (AFP).- Den último simannan Rusia a baha vários general i otro funshonarionan ku funshon haltu den defensa ku e meta pa restrukturá e grupo mas ariba di su forsanan armá, kuestioná pa nivel di korupshon i inefisiensia na momento ku nan ke duna mas forsa na e ofensiva den Ukrania.
Outoridatnan a informá e detenshon di Vadim Shamarin, hefe asuntu di Estado Mayor pa komunikashon, i di Vladimir Verteletski, hefe di un servisio di departamento di kompra públiko di ministerio di defensa. Shamarin a keda arestá djárason pa “aseptá un soborno importante” i ta kore riesgo di haña kastigu di 15 aña di prisòn.
Verteleski a keda akusá di “abusu di poder ehersiendo su funshonnan” i ku el a okashoná un pèrdida di mas di 70 mion rubio (US$ 769.000) na ehérsito ruso.
Promé ku Verteletski i Shamarin, tambe a detené Timur Ivanov (vise minister di defensa) i Yuri Kuznetsov (rekursonan humano).
Otro general, Ivan Popov, resientemente a keda detené pa froude.
E minister di defensa di hopi aña dje presidente Vladimir Putin, Serguei Shoigu, a keda remplasá medio mei pa un ekonomista sin eksperensia militar, Andrei Belousov.
Segun analistanan polítiko, ta parse ku e meta ta pa haña mihó resultado den guera promé ku ehérsito Ukraniano rekuperá forsa ku yegada di armanan nobo for di oksidente i mobilisashon di sòldánan nobo.
