BUENOS AIRES, AP.- Un hues federal a prosesá eks presidente argentino Cristina Fernandez i su dos yunan djamars pa supuesto labamentu di plaka.
Hues federal Claudio Bonadio a ordená un embargo riba vienes di Fernandez te ora e kubri e suma di 8,3 mion dòler i a prohibí e eks mandatario i su yunan di sali di e pais. E prosesamentu a wòrdu publiká pa Sentro di Informashon Hudisial riba su página di Internet.
E hues a informá ku no tin riesgo di huida di e sospechosonan i p’esei e no a ordená prizòn preventivo.
Bonadio a konsiderá ku e eks dirigente, di 64 aña, ta “penalmente responsabel di delitonan manera tuma parti den un asosiashon ilegal temporada ku e tabata presidente di e pais”. Segun e sospecho, e tabata risibí soborno di empresarionan benefisiá ku diferente negoshi den Estado.
Esaki ta e terser prosesamentu kontra di e eks mandatario desde ku el a bandoná poder na final d 2015. Den un otro kousa di kargo di Bonadio, e ta akusá di a ordená maniobranan iregular riba merkado ku a kousa un perhuisio ekonómiko kontra Estado i den un terser un otro hues federal a prosesá Fernandez pa atministrashon froudulento den obranan públiko.
