WASHINGTON, USA (AFP).- Un lei ku ta prohibí aborto despues di seis siman di embaraso a drenta na vigor na Florida, kaminda e vise presidente norteamerikano Kamala Harris a kulpa e eks-presidente republikano Donald Trump di a restringí derechinan di hende muhé.
“Nos a biba un atake, estado tras di estado, kontra di libertatnan reproduktivo i nos sa ken ta responsabel di esei: e eks-presidente Trump a hasi e kos ei”, segun e demokrat a deklará durante un evento di kampaña na Jacksonville.
Trump, kende lo enfrentá e presidente demokrat Joe Biden den elekshonnan di novèmber, ta elogiá su mes pa e echo di a permití ku Korte Supremo den yüni di 2022 a pone e fin na e derechi di aborto i a laga e asuntu ei den man di estadonan. Un desishon ku tabata posibel pasobra durante di su mandato (2019-2021), e magnate a len na fabor di Tribunal Superior ku su maneho konservador ku renobashon di tres di su nuebe huesnan.
“Na momento ku kumpli seis siman, “vários hende muhé ni sikiera sa ainda ku nan ta na estado”, segun Harris a kritiká.
“Esei ta indiká ku e ekstremistanan ku a redaktá e prohibishon ei no sa kon kurpa di hende muhé ta funshoná òf no ta preokupá nan mes ku esei”, segun el a agregá.
Biden, di 81 aña, siman pasá a biaha pa Florida, un dje estadonan mas poblá dje pais, ku den su mayoria a vota pa Trump den e último dos elekshonnan presidensial. E demokratnan ta purba pa hasi aborto un dje temanan prinsipal di reelekshon di novèmber benidero.
