BOGOTA, COLOMBIA (AFP).- Presidente di Colombia, Gustavo Petro, a duna di konosé ku su pais lo kibra relashonnan diplomátiko ku Israel pa motibu dje guera den Gaza. E anunsio aki a kai den mal tera serka gobièrnu israelí pero a keda selebrá komo “un viktoria” pa e grupo islamita palestino Hamas.
“Mañan (awe) nos lo kibra e relashonnan diplomátiko ku e estado di Israel pa motibu dje presidente genosidio”, segun e mandatario iskierdista refiriendo na e promé minister Benjamin Netanyahu.
Petro na vários okashon a kritiká e reakshon dje ehérsito di Israel den Gaza despues dje atakenan di Hamas den òktober di 2023 den teritorio israelí.
“No por bai bèk den e tempu di genosidio, tempu ku ta kaba ku un pueblo hinter”, segun e presidente kolombiano den diskurso riba Plaza de Bolivar, kaminda míles di su simpatisantenan a reuní en konekshon ku Dia di Trahadónan.
Despues dje anunsio, e kansier israelí, Israel Katz, a opiná ku Petro “a disidí pa apoyá e mònsternan mas despresiá ku humanidat a konosé”.
Di su parti, e mando di Hamas den un komunikado a deklará di ta”apresiá enormemente e posishon” dje mandatario . “Nos ta konsiderá esaki komo un viktoria pa e sakrifisionan di nos pueblo i e kousa pa kua ta lucha”, segun e movementu, ku a hasi yamada riba otro paisnan di e region pa kibra nan relashonnan diplomátiko ku Israel.
