LOS ANGELES, USA (AFP).- Polis na Merka ayera a subi tereno di vários ‘campus’ universitario, entre kua na Los Angeles i New York, e prinsipal esenarionan di protesta di studiantenan kontra di intervenshon di Israel den Gaza. Kantidat grandi di vehíkulonan polisial tabata den campus di California University, den Los Angeles, despues di enfrentamentu violento ora ku atversarionan a ataká studiantenan pro Palestina.
Na New York, Columbia University a lanta bou di fuerte protekshon polisial despues ku djamars anochi mester a usa forsa kontra di manifestantenan pro palestino kendenan a sera nan mes den un edifisio miéntras ku tambe mester a saka otronan ku no ker a bandoná tereno di e universidat.
Polis a bisa ku a hasi vários detenshon na e universidat Jesuita di Fordham, den New York. Alrededor di 300 manifestante a keda arestá.
Alkalde dje siudat, Eric Adams, a akusá “hendenan ku no ta dje universidat” di ta esnan ku ta kousa problema.
E rektor di Columbia, Minouche Shafik, ku na dos okashon den ménos ku dos siman mester a pidi polis pa kibra protestanan, a bisa den un komunidat di ta sinti “tristesa profundo” i ku e ta lamentá ku a yega na e situashon aki.
Na New York, algun studiante a lamentá e “brutalidat i agresividat” polisial. Un studiante sigur a keda hospitalisá i otronan a keda detené durante di vários ora.
