WASHINGTON, USA (AFP).- E republikano Donald Trump a evitá na komprometé su mes na rekonosé resultadonan di elekshon presidensial di novèmber benidero, den kua lo e enfrentá e aktual presidente Joe Biden. “Si tur kos kana na manera honesto, lo mi aseptá e resultadonan”, segun e eks-presidente, puntrá riba e elekshonnan presidensial.
“Pero si no t’asina, nos tin ku lucha pa e bon di pais”, segun el a bisa den komentarionan similar na loke el a hasi despues dje elekshon di 2020, ora ku e no a aseptá e derota na man dje demokrat Biden.
“P’ami ta bon kla, Donald Trump ta representá un peliger pa nos Konstitushon i pa demokrasia”, segun e bosero dje ekipo di kampaña di Biden.
Djamars último e eks-presidente republikano ya a laga sierto duda den su kontesta riba e posibilidat ku por bolbe surgi violensia polítiko despues dje elekshon di novèmber.
“Ta dependé, si nos no gana”, segun Trump, kende su sostenedónan konvensí di a gana elekshon di 2020, a ataká e sede di Kongreso.
E eks-hefe di estado ketu bai ta keda prosesá pa su papel den e atake ei i pa a purba kambia resultadonan elektoral, spesialmente den e estado di Georgia.