PALESTINA (AFP).- Un representante haltu dje movementu polítiko islamita Hamas a akusá e promé minister israelí Benjamin Netanyahu di ta purba na stroba e negosiashonnan di pas den e strook di Gaza, kaminda ya pa kasi shete luna tin guera.
“Netanyahu tabata e elemento ku a stroba tur e otro buèltanan anterior di diálogo òf negoshashon i ta bon kla ku e ta sigui hasi esei”, segun Hosam Badran a deklará na AFP.
“E no tin interes den ningun akuerdo i p’esei e ta sigui ku su deklarashonnan, pa frustra e esfuersonan”, segun e dirigente, refiriendo na e promesa di Netanyahu pa ordená un invashon di Rafah, den zùit di Gaza.
E dirigente israelí a bisa ku Rafah ta e último siudat dje komandonan di Hamas i ku e no por proklamá viktoria miéntras ku no tin un operashon na tera den e siudat ei kaminda tin 1.5 mion palestino, den su gran mayoria hendenan ku a hui drenta e siudat pa motibu dje guera.
“Nos ta drenta Rafah i nos lo eliminá Hamas, ku òf sin akuerdo di pas, pa logra e viktoria total”, segun e presidente israelí a deklará djamars último.
Badran a asentuá ku Hamas lo studia ku “espíritu positivo” e último proposishon pa stòp ku e guera i e liberashon di e rehennan kapturá pa komandonan islamita durante e atake di 7 di òktober den zùit di Israel, despues di lunanan di negoshashon sin resultado.
E hefe dje movementu islamita, Ismael Haniyen, djaweps a usa e mesun palabranan i a bisa ku “hopi lihé” lo nan manda un delegashon na Cairo, kaminda lo tuma lugá e negosiashonnan ku mediashon di Egipto, Qatar i Merka.
