SAO SEBASTIAO (AFP).- E desaster di klima kousá pa yobida hopi fuerte den zùit di Brasil a hasi e situashon mas grave, ku 37 morto i 74 hende ku nan a pèrdè, miéntras ku áwaseru ta sigui menasá e kapital di Rio Grande do Sul ku inundashon sin presedente.
Na Porto Alegre, kapital di Rio Grande de Sul, e situashon lo ta “sin presedente”, segun e gobernador Eduardo Leite.
“Lubidá tur loke bosnan a mira… den e region metropolitano lo ta muchu mas pió”, segun el a atvertí. E kresementu lihé dje riu Guaíba den último oranan por kubri un área grandi dje siudat, ku un poblashon di 1.5 mion habitante.
E nivel dje riu, kalkulá na e momento ei entre 4.20 i 4.60 meter, ta “históriko” i ta kalkulá ku lo e superá 5 meter, segun Leite.
Un desborde por kousa e inundashon di mas serio den historia dje siudat, segun outoridatnan. Imágennan aéreo dje estado ta mustra superfisienan grandi kubrí pa awa, tambe riunan ku ta lastra brùg i kamindanan.
Na Capela de Santana, nort dje kapital dje estado, un kriadó di bestia a splika ku e mester a bandoná su tereno i e bestianan kualnan sigur lo hoga.
Te ku ayera tardi e balansa tabata di 37 morto, 75 persona kendenan a pèrdè i otro 74 herido, segun Defensa Sivíl. Te na e momento ei 351.000 habitante a keda afektá, ku 23.600 famia kendenan a pèrdè nan kas.
E pronóstiko di tempu ta indiká muchu mas áwaseru fuerte pa djadumingu awor.
