ISLAMABAD, AP.- China a manda un avion kargá ku personal i suministro médiko pa yuda Pakistan den e lucha kontra propagashon di Coronavirus den un di e nashonnan mas poblá na mundu, segun indikashon di e Ministerio di Eksterior Pakistani.
Outoridat den Medio Oriente ta duda ku e sistema di salú por enfrentá e kantidat kresiente di infekshon mirando ku e region a wòrdu afektá pa vários guera, krísis di refugiado i instabilidat ekonómiko.
Iran ta e pais mas afektá den e region. E kanal di televishon estatal a reportá 139 morto mas djasabra, subiendo e kantidat di víktimanan ku a muri na 2.517 persona di 35.408 kaso konfirmá.
Pakistan tin un poblashon di 220 mion persona i a anunsiá 1.321 kaso konfirmá di COVID-19 i 10 morto. Mayoria infekshon ta di pakistaninan ku a biaha pa Iran.
Pakistan a sera su frontera ku Iran i Afganistan, pero a haña kritiká pa e forma kon e pais a reakshoná pa para e vírus inisialmente.
Otro fokonan di preokupashon ta Yemen, kaminda tin un guera sivil ta tumando lugá ya pa sinku aña kaba.