CURA DOET ta pasa pa Kurason pa Kòrsou

Lokal

Despues di diestres aña, Curaçao Cares ta entregá

E akshon boluntario di mas grandi na Kòrsou

WILLEMSTAD.- Ayera Curaçao Cares i Kurason pa Kòrsou Community Foundation ta para ketu na e traspaso di CURA DOET. E traspaso formal a tuma lugá na sèptèmber. Despues di diestres edishon, 3.310 proyekto realisá i mas ku 350 organisashon sosial ku tabata involukrá, Curaçao Cares ta entregá organisashon di e akshon boluntario ku orguyo i gradisimentu. Kurason pa Kòrsou ta sigui traha riba e base aki, ku atenshon èkstra pa hóben. E siguiente edishon lo tuma lugá dia 14 i 15 di mei 2027. For di awe, organisashonnan sosial por inskribí nan proyektonan via www.curadoet.com.

Diestres aña di kompromiso i kolaborashon

Na 2014, Curaçao Cares a organisá CURA DOET pa promé biaha, huntu ku Oranje Fonds. E promé edishon tabatin 130 proyekto. Ku e kontribushon di Reda Sosial i mas ku shen organisashon sosial i partnernan lokal, CURA DOET a bira e akshon boluntario di mas grandi na Kòrsou i den Karibe, ku generalmente entre 4.000 i 5.000 boluntario pa aña.

Tras di e sifranan aki tin hende ku a saka tempu pa otro. Boluntarionan a drecha skol i sentro di bario, a mehorá fasilidatnan deportivo i a organisá aktividat pa mucha, hende grandi i gruponan vulnerabel. Kompanianan a kontribuí ku nan empleadonan, material i konosementu. Organisashonnan sosial a haña yudansa pa realisá deseonan ku nan tabatin di hopi tempu kaba.

E balor di CURA DOET a keda visibel den kada enkuentro. Hende ku kisas nunka lo a konosé otro a traha banda di otro i a deskubrí kuantu nan por hasi pa otro ora nan traha huntu.

Entregá e batuta ku gradisimentu

Pa Curaçao Cares, e traspaso aki ta un momento spesial. Durante diestres edishon, direktiva, miembronan di e tim, boluntario i partnernan a dediká nan mes pa hasi CURA DOET posibel. Esaki a pidi hopi tempu, dedikashon, perseveransia i kompromiso personal.

“Tur kos a kuminsá ku un soño, i awor e ta di nos tur, literalmente di henter Kòrsou. Aña tras aña, nos a mira e mihó di nos isla, pasó den tur bario i den tur skina tin hende di diferente orígen i edat kla pa yuda otro. Ora bo a sòru pa algu krese durante diestres aña, laga esaki bai ta trese un sintimentu dòbel. Nos ta sinti un tiki di nostalgia, pero prinsipalmente nos ta orguyoso ku nos por entregá e batuta”, segun Lysayé de Windt & Deva-Dee Siliee, fundadónan di Curaçao Cares.

Nan ta gradisí tur boluntario, organisashon sosial, kompania, skol, spònser i partner ku aña tras aña tabata kla pa kontribuí. E dedikashon aki a duna CURA DOET un lugá fiho den komunidat di Kòrsou i ta forma e base pa e siguiente fase.

Nos ta sigui huntu, ku mas espasio pa hóben

Kurason pa Kòrsou ta sigui traha ku e ret di kontakto aki i ta duna hóben mas espasio pa kontribuí. Ademas di partisipá komo boluntario, e fundashon kier stimulá nan pa pensa riba nan propio proyektonan, yuda organisá nan i tuma responsabilidat pa e komunidat kaminda nan ta biba.

Nan ta animá skol, organisashon di hubentut, klup deportivo i kompania pa kontribuí na esaki. Ora hóben i boluntario ku eksperensia traha huntu, nan por siña di otro. CURA DOET ta keda un akshon boluntario pa hende di tur edat.

Dia 14 i 15 di mei 2027, ta invitá habitante, kompania, skol, famia i grupo di amigu atrobe pa pone man na obra huntu. For di awor, organisashonnan sosial por inskribí nan proyektonan via www.curadoet.com. Informashon tokante inskripshon di boluntario lo sigui via e kanalnan ofisial.

E organisashon ku ta karga CURA DOET ta kambia. E kompromiso di tur hende ku a yuda desaroyá CURA DOET ta sigui ku nos den e siguiente edishon.

Duna un man, gan’un kurason!