Update: Damen (Dòk) ta paga famia di víktimanan 300 mil pero no ta atmití kulpa

Update: Inspekshon di Labor a investiga pa evita ripitishon

Inspekshon di labor, ku ta kai bou di ministerio SOAW tambe a emití un relato dunando algun detaye di e investigashon ku nan a hasi relashoná ku e kaso trágiko den Dòk ku a kosta bida di dos bushi. Di parti di Damen tambe a sali un deklarashon.

Inspekshon di labor ta splika ku e trayekto pa pòmp dok-B pa hasié bashí, a dura mas largu ku normal P’esei a manda dos bushi pa wak si akaso ta e ‘sluis’ ta lèk. Sinembargo e ‘hulp sluis’ tabata habrí debí na un fayo i esei a pone ku a chupa e dos bushinan den un roster den fondo di e Dòk. Konsekuentemente nan oksígeno a kaba i nan a muri hogá. A tuma medida pa evitá ripitishon.

Dikon a dura kasi tres aña promé ku ta duna informashon riba e investigashon di e kaso? Inspekshon ta splika ku inspekshon no ta hasi investigashon pa kulpa niun hende, pero pa evitá ku mesun fayo ta ripití.

Debí ku ta un kaso kompliká OM a pidi pa hasi investigashon huntu ku inspekshon di labor di SOAW.

Miéntras e investigashon tabata kanando inspekshon tampoko no por a publiká nada. Durante di e investigashon solamente por a kompartí informashon di e investigashon ku e famia, abogadonan, Damen i e kontratista ku ta Curaçao Industrial Diving. A tuma medida e.o ku no ta manda bushi mas pa sera e ‘hoofdafsluiter’ di e Dòk. A drecha e ‘hulpafsluiter’ i tambe a drecha e porta di dok-B, asina e informe di Inspekshon di Labor ta informa. Mas detaye den edishon di EXTRA.

OM a ofresé Damen transakshon pa evitá persekushon penal

WILLEMSTAD.-Ministerio Publiko den un informe ta indiká ku OM a ofresé Damen Shiprepair Curaçao (Dòk) un transakshon relashoná ku e aksidente ku a tuma lugá den Dòk na sèptèmber 2020 den kua dos sambuyadó a pèrdè nan bida debí na eror. Ta trata di e aksidente kua tuma lugá dia 29 di sèptèmber 2020 riba e waf kaminda ta drecha barku di Damen Shiprepair Curaçao. E dos sambuyadónan ta traha pa un kontratista spesialisá ku tabata ehersé nan trabou. Resultadonan di e investigashon penal ta konfirmá e sospecho ku dia 21 di sèptèmber 2020 tabatin kestion di ‘dood door schuld’.

Un evaluashon profundo di tur echo, sirkunstansia i interes den e kaso aki a resultá den e desishon pa ofresé Damen Shiprepair Curaçao un transakshon pa evitá persekushon penal. Ministerio Públiko a informá famia di e víktimanan tokante esaki. Ministerio Públiko ta konsiderá un transakshon un areglo apropiá. 5 di òktober 2023 Ministerio Públiko i Damen Shiprepair Curaçao a sera e areglo di transakshon.

Damen Shiprepair Curaçao no ta atmití kulpa, pero ta sinti un responsabilidat moral spesialmente pa famia di e dos víktimanan. Den kuadro di esaki, Damen Shiprepair Curaçao ta paga un suma di NAF 300.000,- na famia di e dos víktimanan. Alabes Damen Shiprepair Curaçao ta paga un transakshon di NAF 50.000,-. Mester por proba i verifiká ku e suma aki lo keda invertí den entrenamentu i edukashon di personal ku ta traha na Damen Shiprepair Curaçao. E invershon ya menshoná ta kontribuí pa evitá ku den futuro tin mas aksidente semehante. Adishonalmente Damen Shiprepair Curaçao a adaptá su proseso i maneho, i alabes tuma medida pa prevenshon di mas aksidente.