WILLEMSTAD.- Ayera e delegashon di Kòrsou enkabesá pa Minister Hato di Hustisia a Sali pa asina asistí na e Universal Periodic Review (UPR) di e Konseho di Derecho Humano di e Organisashon di Nashonnan Uní (United Nations Human Rights Council). Alabes, komo ku Aruba i Sint Maarten tambe lo ta representá dor di nan Minister di Hustisia aya na Ginebra pa e UPR, e tres paisnan (Kòrsou, Aruba i Sint Maarten) a disidí di organisá un Reunion Hudisial Tripartito na Ginebra mes.
E UPR ta un mekanismo di evaluashon di Nashonnan Uní ku ta tuma lugá kada 4 aña. Durante e UPR e situashon di derecho humano di kada pais miembro di Nashonnan Uní lo keda evaluá. E proseso di UPR ku ta tuma lugá bou di ouspisio di e Konseho di Derecho Humano ta brinda tur Pais e oportunidat pa presenta inisiativanan ku a tuma pa drecha e situashon di derecho humano den kada pais. Despues di e presentashon di kada pais, otro paisnan miembro di e organisashon di Nashonan Uní por reakshoná i por duna rekomendashon unda nan ta mira espasio pa mehorashon. Pa e UPR, kada pais mester entregá un raport ku ta elaborá riba su propio situashon di derecho humano. Komo ku tin un limitashon pa e kantidat di topiko ku por abordá den e raport aki, kada pais mester skohe topikonan relevante, i tambe ta di suma importansha pa indiká progreso di implementashon di kada rekomendashon ku a keda aseptá durante e UPR anterior.
Mañan e revishon di Reino Ulandes lo tuma lugá na Ginebra den presensia di Minister di Asuntunan Interior i Relashonnan den Reino i Ministernan di Hustisia di Kòrsou, Aruba i Sint Maarten. Promé ku partisipá na e UPR, Kòrsou, Aruba i Sint Maarten lo tene un reunion hudisial tripartito na Ginebra riba nivel Ministerial.
Inisialmente e reunion aki mester a tuma lugá na Sint Maarten na luna di oktober, pero esaki no a tuma luga mas pa motibunan fuera di alkanse di kada pais.
